Nêçîrvan Barzanî serokwezîrê Herêma Kurdistanê, êvariya roja sêşemiyê 28.06.2016ê li bajarê Hewlêrê, pêşwazî li Matiyas Mîtman konsulê giştiyê Wîlayetên Yekgirtiyên Amerîkayê li Hewlêrê û Kêm Giros konsulê nû yê Amerîkayê bo Herêma Kurdistanê û şandeya pê re kir.

Di civînekê de, Mîtman ku, di demeke nêzîk de wezîfeya wî weke konsulê giştiyê Amerîkayê li Herêma Kurdistanê bi dawî tê, ji bona wê hevahengî û hevkariya di navbera wan de hebû, sipasiya serokwezîr û xelkê Kurdistanê kir û destxweşî li xelk û hikûmeta Herêma Kurdistanê kir ku, di demeke gelek dijwar de karîn bi baştirîn awayî îdareya herêma xwe bikin û destketiyên baştir bidest bixin.

Mîtman, Kîm Giros ku, dê di demeke nêzîk de weke konsulê giştiyê Amerîkayê li Herêma Kurdistanê dest bikar bibe, bi serokwezîr Nêçîrvan Barzanî da naskirin û hêvî xwest ku, ka çawa piştgirî û hevkarî bi wî re dihat kirin, bi heman awayî xelk û hikûmeta Herêma Kurdistanê piştgirî û hevkariya Groz bikin ku, ew jî dê li ser xebatên xwe yên ji bo zêdetir bihêzkirina têkeliyên Kurdistan û Amerîkayê berdewam be.

Nêçîrvan Barzanî sipasiya Mîtman kir ku di dema karkirina xwe de li herêma Kurdistanê gelek karên baş kirin û hêvî kir ku ew di karê xwe yê nû de serketî be. Serokwezîr tekîd kir ku, ka çawa hikûmeta Herêma Kurdistanê hevkar û piştevanê konsulê berê yê Amerîkayê bû, bi heman awayî piştevan û hevkarê konsulê nû jî dibe û hêviya serketinê jê re xwest.

Barzanî got ku, xelk û hikûmeta Herêma Kurdistanê dixwaze baştirîn têkelî digel welatên cîhan û herêmî hebe û hêvî xwest ku, têkeliyên Hewlêr û Waşîngtonê xurtir û berfirehtir bibin.

Rewşa Herêma Kurdistanê, têkeliyên Hewlêr û Bexdayê, pêşhatên dawiyê yên şerê dijî terorê û çend pirsên din di civînê de haitn gotûbêj kirin.