Li Babê 20 welatiyên din yên Kurd hatin kuştin
Terorîstên DIŞIê li dijî kurdên herêma Babê komkujiyeke din pêk anîn. Herî kêm 20 welatî hatin kuştin û 900 kes jî hatine revandin.
Çavkaniyên taybet ên ANHA’yê ji herêma Babê ragîhadnin ku terorîstên DIŞIê 15 gundên Kurdan ên girêdayî Babê dorpêç kirine, her gav û saet êrîşî welatiyên van gundan dikin.
terorîst ji van gundan 900 welatiyên Kurd ku di nava wan de jin û zarok jî hene, revandin û ew xistin Girtîgeha Bajaroka Qebasînê yê girêdayî Babê.
Li gorî heman çavkaniyan, çete girtiyan bi zorê dişînin eniyên şer ên bajaroka El-Rayî û Minbicê û bi xendekan bi wan didin kolandin, her wiha wan wekî mertalên zindî bikar tînin.
Ji girtiyan 20 kesên ku hewl dan xwe ji destê çeteyan xelas bikin û fermanên wan red kirin, li ser destê çeteyan bi şêwazekî hovane hatin kuştin û 21 kes jî birîndar bûn.
Gundên ku piraniya şêniyên wan Kurd in û rastî êrîşên çeteyan tên ev in: Qar Kelbîn, Qibet El-Şîh, Ereb Wêran, Kehîbê, Sosinbat, Şibêran, Til Betal, Kawkulî, Şawa, El-Erîmê, Til Cerha, Numan, Qebasîn, El-Nêrebiyê û El-Boxaz.
