Roja şemî 11.06.2016 li Selahedîn birêz Mesûd Barzanî Serokê Herêma Kurdistanê pêşwaziya şandekî siyasî û serbazî ya Amerîka kir ku ji Stuart Jones Balyozê Amerîka li Iraq û General Sean MacFarland Fermandeyê Hêzên Hevpeymanan li Iraq û hejmarek ji berpirs û şêwirmendên serbazî ya artêşa Amerîkayê pêkhatibûn.

Li hevdîtinê de rewşa meydanî ya bereyên şerê dijî terorîstên Da'îş li bajarê Felluce û parêzgehên dinê Iraqê guftûgo kirin û şanda mîhvan Serok Barzanî ji planên Amerîka û hevpeymanan ya ji bo têkşikandina terorîstên Da'îş li cihên cûda cûdayên Iraq û Sûriye agahdar kir.

Her li vê civînê de di derbarê operasyona azadkirina Musil û qonaxa piştî Da'îş û çawayiya birêvebirina parêzgeha Nînowa li piştî Da'îş danustandina bîr û ramanan kirin û her du alî li ser ewe hevrebûn ku pêwîste bi hurî qonaxa piştî Da'îş bê nirxandin û tekez jî li ser beşdariya pêkhatan ya li proseya azadkirina Musilê de kirin.

Li beşekî dinê civînê de hemahengiya di navbera hêzên Pêşmergeyên Kurdistanê û hêzên hevpeymanan bilind nirxandin û ronahî xistin li ser bi cîhkirina biryara Amerîka ya yarmetîdana darayî û hevkarîkirina hêzên Pêşmergeyên Kurdistanê.

Li vê civînê de hejmarek ji berpirsên emnî û serbazî û siyasiyên bilindên Herêma Kurdistanê amade bûn.