Şandeke Komîteya Rûbirûbûna Îşkenceyê ya Konseya Ewropayê (CPT) ku li girtîgeha Îmraliyê serdana Rêberê PKKê Abdullah Ocalan kiribû, ragihand ku rewşa wî ya tenduristiya wî baş e.

Şanda CPTê bi serperitiya Mykola Gnatovskyy di rojên 28-29ê Nîsanê de bo şopandina rewşa Rêberê Partiya Karkerên Kurdistanê (PKK) Abdullah Ocalan çûbû girtîgeha li girava Îmraliyê û bi wî re hevdîtin pêk anibû.

Li gor agahiyan hatine bidest xistin, şanda CPTê ya hevdîtin ligel Ocalan pêkanî, piştî hevdîtinê ji şanda Tirkiyê re ragihandiye ku rewşa Ocalan a tenduristiyê baş e û odeya ku lê dimîne jî ji aliyê fizîkî ve bêkemasî ye.

Hat gotin şanda CPTê di mijara ku parêzer û kesûkarên Ocalan serdana wî bikin de pêşniyarên xwe bide rayedarên Tirkiyê.

Herwiha CPTê dê derbarê Ocalan de raporekê amade bike û dê piştre pêşkêşî Konseya Ewropayê bike.

Abdullah Ocalan ji sala 1999an ve di girtîgeha Îmraliyê de ye û heya niha 10 caran şanda Konseya Ewropayê serdana wî kiriye. Serdana pêştir a şanda Konseya Ewropa bo cem Ocalan di sala 2013ê de bû.

Şanda CPT di asta navdewletî de tekane alî ye ku dikare serdana Abdullahocalan bike. (Çavkanî Milliyet)

Rudaw