Wezîra Îsraîlî: Êdî dema damezirandina dewleta kurdî hatiye!
Wezîra Dadê ya Îsraîl, Aylêt Şakîd, di konferansa asayişa Îsraîlê de, ku duh li paytext Til Avîvê hat lidarxistin, axivî û behsa serxwebûna Kurdistanê û dewleta kurdî kir.
Aylêt Şakîd, diyar kir ku kurd, dost û şirîkê Îsraîl in û dema wê hatiye bibin xwedan dewlet. Şakîd wiha domand:
“Em bi hemû hêza xwe piştgiriya damezirandina dewleta kurdî li Rojhilata Navîn dikin. Bi baweriya me, dewleta kurdî bi sûda Îsraîlê ye û bi vê yekê dijminên me dê lawaz bibin.”
Wê wezîra cihû her wiha anî ziman ku berjewendiyên Îsraîl û Kurdan, hevbeş in û her du jî li dijî hebûna komên radîkal û cîhadî li Rojhilata Navîn in.
Li gorî wê rayedara Îsraîlî, kurd mafên mirov baş diparêzin û qîmeta jinan dizanin, her wiha kurd miletekî esîl û aştîxwaz ê Rojhilata Navîn in û di dîroka xwe de êrişî ti welatekî nekirine.
Wê endama kabîneya Serokwezîr Binyamîn Netanyahu, bang li hikûmeta Îsraîlê kir, pêwendiyên xwe bi Herêma Kurdistanê re xurt bike û di tevahiya waran de alîkariya Hewlêrê bike.
Zêdetirî 200 hezar kurdên cihû li Îsraîlê dijîn ku di dema damezirandina dewleta Îsraîlê de, ji her 4 parçeyên Kurdistanê çûbûn Îsraîlê. Kurdên Îsraîlê herî zêde li bakurê welêt û li bajarê Kefar Yûna li bakurê Til Avîvê dijîn.
Serokwezîr Binyamîn Netanyahu jî beriya niha gotibû, mafê Kurdan e bibin xwedan dewlet.
Rudaw
