Li bajarê Dêrikê yê Rojavayê Kurdistanê alîgirên Encumena Niştimanî ya Kurd li Sûriyê (ENKS) daketin xwepêşandanê, lê endamên asayişê û alîgirên Tevger Civaka Demokratîk (TEV-DEM) bi tundî êrişî wan kirin.

ENKSê biryar dabû ku îro li bajarê Dêrikê xwepêşandaneke pirotestokirinê li dijî biryarên Rêveberiya Xweser a ser bi Partiya Yekîtiya Demokratîk (PYD) ve mîna ferzkirina programa xwendinê, lidar bixe.

Berpirsê Ragihandina ENKSê li Dêrikê Bengîn Hacî Ehmed ji Rûdawê re ragihand: “Dema xwepêşanderan dixwestin bighêjin cihê xwepêşandanê, alîgirên TEV-DEMê rê li pêş wan girtin.”

Bengîn Hac Ehmed wiha got: “Xwepêşanderan xwestin rêya xwe biguhêrin lê rastî êrişa Asayişê û alîgirên TEV-DEMê hatin. Asayişê û alîgirên TEV-DEMê bi hevre li xwepêşander û medyakaran dan û gelek xwepêşander hatin girtin.”


Hac Ehmed wiha domand: “Endamên asayişê bi çekan êrişî xwepêşanderan kirin û nehiştin xelk kom bibin.”

Rudaw