Nûnerê Taybetî yê Serokê Amerîka yê di Hevpeymaniya Navdewletî ya li dijî DAIŞê de, Brett McGurk di hevdîtina xwe de ligel Serokwezîrê Herêma Kurdistanê Nêçîrvan Barzanî tekez kir ku, Amerîka piştevanê Pêşmerge ye.

Serokwezîrê Herêma Kurdistanê Nêçîrvan Barzanî pêşwaziya Nûnerê Taybetî yê Obama di Hevpeymaniya Navdewletiya û şanda leşkerî û dîplomasî ya ligel wî kir.

Di hevdîtinê de rewşa dawî ya eniyên şer û serkeftinên Hêzên Pêşmerge û rewşa siyasî û ya navxwe hat gotûbêjkirin.

McGurrk bahsa operasyona hevbeş a Hewîce kir û destnîşan kir ku ev operasyon serkeftî bûye û bi vê operasyonê jî diyar bû ku Pêşmerge bêyî cûdahî parastina hemû welatiyên Iraqê dike û parastina wan jî bo xwe weke erk dizane, lewma ew piştevaniya Hêzên Pêşmerge dikin û dê li ser wê yekê berdewam be.

Nûnerê Obama ronahî xist ser pêwendiyên Amerîka û Herêma Kurdistanê û xwest ku pirsgirêkên navxweyî û nakokiyên Hewlêr û Bexdayê bi rêya diyalogê bêne çareserkirin.

Ji aliyê xwe ve, Serokwezîrê Kurdistanê jî spasiya alîkariyên Amerîkayê kir û carek din jî ji ber leşkerê amerîkî yê ku di operasyona Hewîceyê de jiyana xwe ji dest dabû, sersaxî bo gel û rêveberiya Amerîka xwest.

Derbar nakokiyên Hewlêr û Bexdayê jî, Barzanî diyar kir ku Hikûmeta Kurdistanê hewl dide pirsgirêkên navxweyî û nakokiyên di avbera Hewlêr û Bexdayê bi diyalog û gotûbêjan çareser bike.

Di hevdîtinê de rewşa giştî ya navçeyê û pêwendiyên herdu aliyan jî hatin gotûbêjkirin.

Rudaw