Serokwezîrê Iraqê Heyder Ebadî ji fraksiyonên Kurdistanê yên di Parlamentoya Iraqê de re got ku, pêwîst e Hewlêr û Bexda pabendî rêkeftina di navbera xwe de bin. Herwiha da zanîn ku, dijminên wan dixwazin ew ji hev dûr bin.

Şandeke fraksiyonên Kurdistanê bi Heyder Ebadî û hejmarek parlementerên fraksiyona Hevpeymaniya Niştîmanî re civiya.

Ofîsa Serokwezîrê Iraqê Heyder Ebadî di daxuyaniyekê de ragihand: “Di civînê de behsa bernameya Hikûmeta Iraqê hat kirin. Herwiha şerê li dijî DAIŞê û serkftinê ku heta niha hatine bidestxistin, hatin nirxandin.”

Li girî wê daxuyaniyê, “Behsa pirsgirêkên aborî û ewlehî û erzanbûna buhayê petrolê û bandora wê li ser budceya Iraqê hatin kirin.”

Di wê civînê de, “Ebadî tekez li ser girîngiya nemana nakokiyan di navbera aliyên siyasî kir û daxwaza yekxistina hewl û kar bo serkeftina şerê li dijî DAIŞê de kir.”

Herwiha Serokwezîrê Iraqê wiha domand: “Dijminên me dixwazin em ji hev dûr bin, lewma pêwîst e em destê xwe bidin hev ji ber ku pêwîstiya gelê Iraqê bi me heye û pêwîst e tiştên baş pêşkêşî wan bikin.”

Ebadî da zanîn ku, “Pêwîst e Hewlêr û Bexda pabendî rêkeftina di navbera xwe de bin.”

Rudaw