Li Tirkiyê, kuştina keça kurd a bi navê Ozgecan Aslan rastî nerazîbûnên tund hat. Serokomarê Recep Tayyip Erdogan, Serokwezîr Ahmet Davûtoglu sersaxî ji malbata Ozgecanê re xwestin. HDPê jî bang li Parlamentoya Tirkiyê kir, qanûnên li dijî jinan bên guhertin.

Nerazîbûn û çalakiyên şermezarkirina kuştina xwendekara kurd Ozgecan Aslan li Tirkiyê didomin.

Serokomar Erdogan û Serokwezîr Davûtoglu bi telefonê sersaxî ji malbata Ozgecanê re xwestin û soz dan ku dê hewl bidin tohmetbarên kuştina keça wan bên darizandin…


Sendîkeya Parêzeran li Mersînê jî bi daxuyaniyekî kuştin û destdirêjîkirina li ser Ozgecan Aslanê şermezar kir û biryar girt ku ewê parêzeriya tawanbaran nekin,û ewê heta dawiyê li kêleka malbata Aslan rawestin û heta dikarin ewê bihêlin ku cezayên herî giran ji tohmetbaran re bên dayîn.


HDPê jî derbarê bûyerên wek bûyera destdirêjkirina li ser Ozgecan Aslan û kuştina wê û siyaseta cudatiya regezî li Tirkiyê pêşinyariyek da Parlamentoya Tirkiyê û xwest ku êdî qanûnên berê yên cudatiyê dixe navbea jin û mêran û desthilatdariya zilaman xurt dike, bên guhartin…

Rudaw