Nêçîrvan Barzanî serokwezîrê herêma Kurdistanê, roja 03.02.2015ê li bajarê Hewlêrê pêşwazî li endamên komîteya êkonomî li parlamentoya Îraqê ji firaksyonên cudayên Kurdistanê kir.

Di civînekê de serokwezîr bi navê xwe û serokatiya civata wezîrên herêma Kurdistanê sipasiya komîteya darayî ya firaksyonên kurdistanî li parlamentoya Îraq kir ku, di amadekirina budceya sala 2015ê de ya Îraq federal roleke erênî lîst û bi canê kurdistanî, hevkarî û hevahengî bi berdewamî digel seroaktiya civata wezîrên herêma Kurdistanê hebû.

Barzanî got ku, karkirin bi canê kurdistanî, karê bi hev re, yekhelwestî û yekdengî xizmeteke mezin bi herêma Kurdistanê û berjewendiyên kurdistaniyan dike û hêvî kir ku heman awayê hevkarî û hevahengî di navbera hikûmeta herêma Kurdistanê û komîteyên din yên parlamentoya Îraqa federal de hebe:
- Tiştek normale li herêma Kurdistanê cudahî di bîrûbawrî û helwestan de hebe, lê gelek giringe hemû firaksyon û nûnerên Kurdistanê li Bexdayê li ser pirsên kurdistanî yekgirtî, yekhelwest û yekrêz bin.

Endamên komîteyê sipasiya helwestê serokwezîran û serokatiya civta wezîran kir û her du aliyan tekîd li ser giringiya hebûna mekanîzmeke aktîv bo hevkarî û hevahengiya berdewam di navbera nûnerên Kurdistanê li Bexdayê û hikûmet û aliyên peywendîdarên herêma Kurdistanê de kir, daku hemû kar bi hema awayê qanûna budceya Îraqa federal birêve biçin û bi rêya wê hevkarî û hevahengiyê bi baştirîn awayî xizmeta berjewendiyan herêma Kurdistanê bikin.