Duh rojeya yekemîn ji sala nû sala 2015ê, Nêçîrvan Barzanî serokwezîrê herêma Kurdistanê serdana bereyên cenga dijî terorîstên DAÎŞ li baskê Giwêr-Mexmur kir û di civînekê de digel fermandeyê giştiyê baskê Giwêr -Mexmur û fermandeyên pêşmergeyê Kurdistanê li bereyên şer li wê deverê, rewş û pêşhatên bereyên şer gotûbêj kirin û behsa serkeftinên pêşmerge li van du rojên çûyî li vê deverê kir ku, pêşmergeyê Kurdistanê di wan du rojan de deverke berfireh ji bin destê terorîstên DAÎŞ azad kir û dirbên mezin û giran li terorîstan dan.


Nêçîrvan Barzanî digel fermandarên pêşmerge serdana çeperên xeta pêşiyê yên pêşmergeyê Kurdistanê kir û di axaftinekê de got ku, ji bona wan serkeftinên mezin yên pêşmerge di van du rojên çûyî de li vê deverê û deverên din bidest xistine destxweşî li pêşmerge kir û bi minasibeta sersala nû ya zayînî pîrozbahiyê li pêşmerge kir û hêvî kir ku sala 2015ê ji bo pêşmer ge û malbatên wan û timama xelkê Kurdistanê sala serkeftin, dawîanîn û jinavbirina teror û terorîstan be û aşitî û îstîqrar û avadeabî ji bo deverê, Îraq û herêma Kurdistanê vegere.


Di berdewamiya axaftina xwe de, Nêçîrvan Barzanî serowkezîrê herêma Kurdistanê hevxemî û sersaxiyên xwe pêşkeşî malbatên şehîdan kir û got ku, pêşmerge biwêrane û mêrxasane ji bona parastina xelk û destkeftiyên Kurdistanê, her ji Kobanî heta Şingal, Celewla û Sadiye, bi can û û xwîna xwe bergiriyê dike û qurbaniyan dide û ew di şerekî de şehîd dibin ku ew şer bi zorê bi ser xelk û herêma Kurdistanê de hatiye feriz kirin.

Serokwezîr got ku, hikûmet kar ji bona reorganîzekirin û biniştimanîkirina pêşmerge dide û rewşa jiyana wan baş bike.