Dizeyî behsa serdana Bexdayê dike
Dizeyî dibêje: Berî heyamekî Adil Ebdulmehdî wezîrê neftê yê hikûmeta Îraqê serdana Hewlêrê kir û digel Nêçîrvan Barzanî serokwezîrê herêma Kurdistanê weke destpêk ji bo çareserkirina pirsgirêkan rêkeftinek îmza kir. Ew rêkeftin weke destpêkek bû jibo destpêkirina danûstandinên cidî û avêtina pêngavên piraktîkî ji bo çareserkirina pirsgirêkên navbera Hewlêr û Bexdayê, li ser esasê wê rêkeftinê û tewsîyeyên parlamentoya Kurdistanê û komîteya danûstandinan ku, ji aliyên siyasiyên herêma Kurdistanê pêkhatiye, sibê şandeyeke balaya hikûmeya herêma Kurdistanê bi serokatiya Nêçîrvan Barzanî serokwezîrê herêma Kurdistanê digel cîgirê serokwezîr û wezîrên peywendîdar û hijmareke şîretmendan dê serdana Bexdayê bike.
Dizeyî got ku, hikûmeta herêma Kurdistanê hertim xwestiye hemû pirsgirêk digel Bexdayê bi rêya diyalogê û lihevtêgihiştinê bên çareser kirin û di berjewendiya hemû aliyan de be. Li ser vê bawerî û pirensîpan û piştî derencamên erênî ji rêkeftina destpêkê a di navbera serokwezîrê herêma Kurdistanê û wezîrê neftê yê hikûmeta Îraqê derketin holê, weke pêngava yekem, sibê şandeya herêma Kurdistanê serdana Bexdayê dike û deriyê diyalog û danûstandina digel Bexdayê vedike bi wê hêviyî ku ew danûstandin dawiyê bi pirsgirêkan bîn in.
Peyvdarê hikûmeta herêma Kurdistanê dibêje ku, serdana Bexdayê û encamdana dîdar û civînan digel berpirsên hikûmeta Îraqê wê manayê nade ku, hemû pirsgirêk bi yekcarî tên çareser kirin û her kes dizane hemû dosiyeye bi serdanekê çareserr nabin. Lê ew bi hêvî ne k u, vekirina deriyê diyalogê destpêkirina danûstandinan rê xweş bike ku, bigehin rêkeftinekê û encamên wê di berjewendiya herêma Kurdistanê û timama Îraqê de bin û cîyê razîbûna hemû aliyan be.
