Serfermandarê Artêşa Dewletên yekbûyî yên Amerîkayê (DYA) Martin Dempsey îro gihîşt paytextê Iraqê Bexdayê û biryar e îro êvarî serdana Kurdistanê jî bike.

Sekreterê Wezareta Pêşmerge ya Hikûmeta Herêma Kurdistanê Cebar Yawer ji Rûdawê re ragihand: “Biryar e îro Serfermandarê Artêşa DYAyê General Martin Dempsey bê Hewlêrê û ligel Serokê Herêma Kurdistanê Mesûd Barzanî û berpirsên Herêma Kurdistanê bicive.”

Cêgirê Wezîrê Parastinê yê Amerîkayê bo karubarê Iraq û Îranê û nûnerê taybet ê Amerîkayê di hevpeymaniya navdewletî li dijî DAIŞê de Brett McGurk nûçeya serdana Martin Dempsey beriya her kesî belav kir.

Ew serdana Serfermandarê Artêşa DYAyê bo Bexdayê ji nişkê ve bû û heta niha bernameya serdana Dempsey bo navaçeyê bi temamî nehatiye xuyakirin.

Rudaw