Serokê Cepheya Turkmenî ya İraqê Erşed Salihî ragehand ku cografya jiyana Turkmenên İraqê ketiye metirsiyê û mafên wan tên binpêkirin. Salihî got: ‘’Turkmen bê çek in, em ji hikûmeta navendî dixwazin ku çekan bide me daku xwe ji metirsiya terorê biparêzin.’‘

Salihî wiha axifî: ‘’Berî niha jî me ev daxwaz kiribû lê tu fêdeya wê nebû, lê belê eger her bê sûd be û guh neden daxwazên me, em dê li deriyên din bidin, em dê li deriyê Tirkiya cîran bidin daku çekan bide me û em xwe pê biparêzin. Herwiha dema peywendiyên navbera Tirkiyê û Îranê nebaş bin, em Turkmen baca wê didin.’‘

Li gor Salihî, Tirkiye li ser bingehê mezhebî ligel Turkmenan tevnagere û wiha dibêje: ‘’Tirkiye li ser bingehê neteweyî ligel Turkmenan dide û distîne. Ji ber dema li Amirlî, Taze û Telefer Turkmen bûn armanca êrîşan, Tirkiye yekem alî bû ku bi hewara me ve hat û alîkarî pêşkêşî me kir.’‘

Derbarê metirsiyên DAİŞ’ê de jî, Salihî di civîneke çapemeniyê de got: ‘’DAİŞ’ê li hemû cihan Turkmen kirine armanc, daku wan bike neteweyekî bê cografya, plana wê jî heye bo parçekirina Rojhilata Navîn daku cografyayên nû lê çêbibin û çend alî jî hene dixwazin Turkmenan ji nav bibin, gelê Turkmen jî her li ber xwe dide daku bimîne.’‘

Basnews