Şerekî giran li navenda bajarê Kobanî di navbera hêzên kurdî û çekdarên DAIŞê de diqewime û balafirên şer jî cihên çekdarên wê rêxistinê bombebaran dikin.

Peyamnêrê Rûdawê ji nêzîkî bajarê Kobanî ragihand: “Ji duh êvarî ve û heta niha, şerekî giran li navenda bajarê Kobanî di navbera Hêzên Pêşmerge û Yekîneyên Parastina Gel (YPG) û Artêşa Azad li aliyekî û çekdarên DAIŞê li aliyê din berdewam dike.”

Bi gotina peyamnêrê Rûdawê her du aliyên şer bi çekên giran û topan çeperên hevdu topbaran dikin.

Vê sibehê peyamnêrê Rûdawê wiha got: “Îro saet 06:00ê sibehê û derengiya şeva borî jî, balafirên şer ên Hevpeymaniya Navdewletî cihên çekdarên DAIŞê, bi taybet li taxên Pîşesaziyê û Kaniya Ereban li rojhilatê Kobanê bi giranî bombebaran kirin û tevgera balafiran niha jî berdewam dike.”

Li rojavayê bajarê Kobanî, Hêzên Pêşmerge bi çekên giran cihên çekdarên DAIŞê li gundên Minazê, Mezra Ebrûş û Elpelorê topbaran dikin û çekdarên DAIŞê jî îro sibehê bi Hawanan hêzên kurdî li girê Til Şeîrê topbaran kirin.

Herwiha peyamnêrê Rûdawê wiha got: “Eniya herî germ ya şer li taxên Pîşesaziyê, bazara Keskaytiyê, Baxçê Hecî Reşîd û Kaniya Ereban e. Herwiha li Başûrê Kobanî jî şer li ser rêya Helebê, taxa Botan û kolana 48 diqewime.”

Rudaw