Nûnerê Herêmê yê Komeleya Mafên Mirov a Tirkiyeyê (ÎHD) Şevket Akdemîr diyar kir ku piştî ku DAIŞê êrişî kurdan kiriye binpêkirina mafên mirov jî li Tirkiyeyê zêde bûye.

Şevket Akdemîr ji Rûdawê re diyar kir ku penaberên Kobanî yên ji ber şer û êrişên DAIŞê reviyane Tirkiye û Bakurê Kurdistanê, di rewşeke nebaş de dijîn û di warê cih û xwarinê de di tengasiyê de ne.

Nûnerê Herêmê yê ÎHDê anî ziman ku him hêzên ewlehiyê him jî erkdarên sivîl ên li ser sînorê navbera Bakur û Rojavayê Kurdistanê serserkî nêzîkî penaberên Kobanî yên li navçeya Pirsûsa Rihayê ne, dibin. Akdemîr wiha axivî:

“AFAD (Saziya Rewşa Awarte) û Hevyasor hinekî alîkariya wan dikin lê têrê nake. Şaredarî jî nikare pêdiviyên 200 hezar kes dabîn bike. Ev jî dibe sedema wê ku penaber di warê cih, xwarin û tenduristiyê de bikevin nav tengasiyê. Zivistan hat lê heta niha ti amadekariyek nehatiye kirin.”

Şevket Akdemîr da zanîn ku penaber li ser sînor rastî mudaxeleyên tund û girtinê tin û wiha axivî: “Yên ku ji Kobanî tên nasnameyên wan tên kontrolkirin û tên girtin lê li ser vê yekê ti daxuyaniyek nayê dayîn. Nahêlin malbatên xwe bibînin. Liv û tevgerek biçûk bikeve nav penaberan hêzên ewlehiyê bi gazê li wan didin û teqe li wan dikin. Tam alozî û tevlihevî ye.”

Akdemîr destnîşan kir ku ji ber xwepêşandanên Kobanî li bajarên Bakurê Kurdistanê rêjeya binpêkirina mafên mirov pir zêde bûye û wiha axivî:

“DAIŞ li Sûriye û Iraqê ye lê bûye çavkanî û sedema binpêkirinan li Tirkiyeyê. Xelkê êrişên DAIŞê protesto dikir lê rastî mudaxeleyek tund hatin paşê kuştin û girtinê dest pê kir, êşkence hat kirin û her cure binpêkirina mafan hat kirin.”

Wî rayedarê ÎHDê behsa wê yekê jî kir ku hikûmet dixwaze destê polîs di serkutkirina xwepêşandan û çalakiyan de bihêztir bike û binpêkirina mafên bike qanûnî. Akdemîr wiha got: “Mîna rewşa awarte û rêveberiya teng nêzîk dibin. Polîs li ser her derî hatiye bicîhkirin. Girtin didome. Ev jî hemû çavkaniya xwe ji wê digire ku hikûmet bi xeletî li mijara DAIŞê dinêre.”

Rudaw