Vê sibê Peşmergeyên Kurdistanê êrîşeke berfireh bo ser Şjngal, Rebîe, Zumarê dan destpêkirin û niha Hêzên Pêşmerge gehiştine navenda Rebîe û di plana wan de heye ku tevahiya deverê kontrol bikin.

Ji eniya Şengalê çavkaniyekê ji BasNewsê re aşkere kir ku ew êrîş bi hevkariya navbera Pêşmergeyên Kurdistanê û Fermandeya Duhokê, Yekîneyên Zêrevanî, Fermandeya Barzan, Leşkerê Taybetê Yekê Gulanê, Lîwaya Yekê ya ser bi Wezareta Pêşmerge û Fermandeya Helgurd hatiye destpêkirin bo azadkirina deverên Zumar, Rebîe û Şengalê.

Li gor heman çavkaniyê, heta niha bi dehan gund ji çekdarên DAİŞ’ê hatine paqijkirin Hêzên Pêşmerge ber bi azadkirina Şengal û Zumarê de pêşve çûnê û zerarên mezin gehandine çekdarên DAIŞ’ê.

Di vê derbarê de, Fermandeyê Spîlkê Mûsa Gerdî ji BasNewsê re got: ‘‘Hêzên Pêşmerge niha di bav Rebîe de ne, balafirên şer jî êrîşên xwe bo ser wê deverê rawestandine û 2 termên çekdarên DAIŞ’ê di destê Pêşmergeyan de ne û yek ji wan kuştiyan Çeçanî ye.’‘ Mûsa derbarê pêngavên paşerojê de jî got: ‘‘DAIŞ peşde vedikişe, em jî li deverê di şer de ne û fermandeyekî me jî şehîd bûye.’‘

Wek tê zanîn di çend rojên borî de, çekdarên Dewleta Îslamî ya İraq û Şamê (DAIŞ), rêya serekî ku Şengalê bi Rojava, Herêma Kurdistanê û bajarokê Rebîe ve girêdide kontrol kiribûn, armanca vê operasyona Hêzên Pêşmerge jî, ew e ku careke din rêya navbera Şengal û deverên din ên Başurê Kurdistanê û Rojavayê Kurdistanê were vekirin.

Basnews