Li Hewlêr a paytexta Herêma Kurdistanê, 30 partiyên kurd li hev civiyan û biryar dan ku bang li Serokê Herêma Kurdistanê û Hikûmeta Kurdistanê bikin ku alîkariya serbazî û mirovahî, demeke zûtir bigihîne Rojavayê Kurdistanê.

Nûnerên 30 partiyên Başûrê Kurdistanê ku beşdarî civînê bûbûn civîneke çapemenî li dar xistin. Nûneran ji Hikûmeta Herêma Kurdistanê xwestin gavek zûtir alîkariya serbazî û mirovahî bişîne Rojavayê Kurdistanê. Her wiha ji hikûmetê xwestin ku bo alîkarî dayîna Rojavayê bang li raya giştiya navneteweyî bike û her wiha Herêma Kurdistanê jî alîkarî bide.

Beşdarvanên civînên gotin, “Rojavayê Kurdistanê ji qonaxeke pir hestiyar û metirsîdar re derbas dibe. Êrişa mezin a terorîstan a li ser Kantona Kobanê heye û şerekî dijwar li wê derê diqewime.”

Her 30 partiyan ji aliyên siyasî yên Herêma Kurdistanê xwestin ku gavek zûtir hevkarî û piştevaniya xwe bigihînin Rojavayê Kurdistanê û domandin, “Di rojeke wiha de divê hemû partiyên Kurdistanê nakokiyên navbera xwe bidin aliyek û berjewendiya neteweyî esas bigrin.”

Partiya Demokrata Kurdistanê(PDK), PDK-Îran, PDK-Suriye, Komeleya Îslamiya Kurdistanê, Partiya Demokrata Sosyalîsta Kurdistanê beşdarî daxuyaniyê nebûn.

Ehmed Kanî Berpirsê Pêwendiyên Niştimanî yê PDKê ji Rûdawê re got, tu agahdariya wan derheqê civîn û daxuyaniyê nebû.

Herwiha Teymur Mistefayî endamê Polîtburoya PDK-Îranê ji Rûdawê re got, partiya wan ji bo beşdarbûna civînê de nehatiye agahdarkirin.