Operasyonên hevpeymaniya navdewletî li dijî rêxistina DAIŞê li Sûriyê didomin û şevê din li çeperên DAIŞê li derdora herêma Kobanê dan.

Duh 23ê Îlonê Berdevkê Wezareta Parastinê ya Amerîkayê (Pentagon) John Kirby, eşkere kir ku Dewletên Yekbûyî yên Amerîkayê (DYA) û welatên hevpeymanên wî welatî, li Sûriyê dest bi êrişên hewayî li dijî DAIŞê kirine.

Şevê din dîsa balafirên hevpeymaniya navdewletî operasyonên xwe li dijî çekdarên DAIŞê domandin û çeperên DAIŞê li Sirîn, Qibe, Pira Qere Qozak, Îlac û Xerab hişk yên nêzîkî Kobanê bombebaran kirin.

Ev çend roj in çekdarên DAIŞê êrişên giran dikin ser herêma Kobanî ya Rojavayê Kurdistanê û bajarê Kobanî dorpêç kirine û şerekî giran di navbera wan û hêzên YPGê de derketiye û heta niha jî didome.

Hêzên dijbereya Sûriyê ragihandin ku hevpeymaniya navdewletî operasyonên nû li navçeya el-Bab ya Helebê li dijî çekdarên DAIŞê pêk anîn.

Herwiha operasyonên duh li dijî DAIŞê li Sûriyê çeperên wê rêxistinê li bajarên Reqayê (nêzîkî bajarê Kobanî), Dêra Zorê, Bûkemal û parêzgeha Hesekê ya Rojavayê Kurdistanê jî ve girtibûn.

Serokê Dewletên Yekbûyî yên Amerîkayê (DYA) Barack Obama roja 11ê Îlona îsal stratejiya xwe ya li dijî DAIŞê eşkere kir û da zanîn ku dê operasyon û êrişên hewayî yên li dijî DAIŞê “li her derî” bên kirin.

Rudaw