Duh Rawêjkara Elmanyayê Angela Merkel pêşwaziya mêvanan ji seranserî welat kir û komek Kurdên Berlînê jî bi navê 'Însiyatîva Piştgiriya Serwxebûna Kurdistanê ' amade bûn.

Di pêşwazîkirina mêvanan de Rawêjkara Elmanyayê Angela Merkel, plakat û wêne îmze kirin û liser dikê pir ji dil bixêr hatina hemûyan kir û piştre li nav mêvanan geriya. Li nav bexçeyê avahiya serokatiya wezîrên Elmanya Merkel axaftineke kurt kir û li ser kar û xizmetên xwe rawestiya. Merkel herwiha helîkoptera xwe jî nîşanî mêvanan da.

Li tenişt avahiyê sahneyeke taybet a mezin hatibû danîn daku kanalên Elmanya bi awayekî zindî axaftina Angela Merkel veguhêzin. Merkel liser 3 babetan tevî pêşkêşkarê kenala WDR Ekrem axifî û şirove kirin.

Babet evna bûn; 'Rewşa Sporê û serkeftina tîma helbijardeyê Elmanya bo qehremaniya Cîhanê bi amadebûna yarîzanekî, babetê li ser jin û rewşa zarokan û çawaniya xwedî derketina hikûmetê li zarokan û nûbûn û avakirin'.

Herwiha Angela Merkel di nav axiftinên xwe de qala Dîwarê Berlînê jî kir û got ' Hûn dizanin yên temenên we mîna yê min mezin, beriya 25 salan welatê me û taybet Berlîn di çi rewş de bûn, lê îro em bi kêfxweşî bi hevra dijîn û me nehişt Berlîn bibe dû dewletên cuda, îro 25 sal derbas bûn li dijî dîktaroriyetê me liber xwe da.'

Însiyatîfa Piştgiriya Serxwebûna Kurdistanê ku li Berlînê di 03.07.2014’an hatiye avakirin û çendîn çalakî lidarxistine, derfet dîtin ku seredana Angela Merkel bikin û wê ji nêzîk bibînin û spasiya wê û hikûmeta wê bikin.

Koma Kurdan nameyek bi Elmanî nivîsibûn ku têde bi navê gelê Kurd spasiya Merkel, hikûmet û gelê Elmanya hatibû kirin û çend plakat ku liser nivîsîbûn Spas Dr. Merkel, spas gelê Elman hatibûn bilind kirin tevî alayên Kurdistanê. Angela Merkel bi vê aksiyona Kurdan pir keyfxweş bû û ji dil spasiya amadebûna wan kir û soz da ku ew dê Kurdan bi tenê nehêlin.

Hêjayî gotinê ye ji sala 1998’an ve hikûmeta Elmanya ya Federal deriyê serokatiyê û hemû wezaretan liber mêvanan vedikin, ji bo hevwelatî seredana wan bikin û ji nêzîk ve cî û kar û xizmetên wan bibînin û bi karmend û wezîr û serok re wêneyan bigrin û hevdîtinan pêkbînin, ev dû sal in grûbên Kurdan jî beşdar dibin.

Basnews