Serokê Herêma Kurdistanê Mesûd Barzanî piştî civîna digel Wezîrê Derve yê Îranê Mihemed Cevad Zerîf ragihand, Îran yekemîn welat bû ku di şerê li dijî DAIŞê çek û alîkarî ji Kurdistanê re şand. Barzanî her wiha ew îdiayên ku dibêjin bendava Mûsilê dîsa ketiye destê DAIŞê jî bi derew derxist.

Wezîrê Derve yê Îranê Mihemed Cevad Zerîf, îro ji Bexdayê gihîşt Hewlêrê. Zerîf bi Serokê Herêma Kurdistanê re hevdîtin pêk anî.

Piştî civînê Barzanî û Zerîf derketin pêşberî rojnamevanan û li ser naveroka civînê daxuyanî dan.

Wezîrê Derve yê Îranê ragihand ku DAIŞ ne tenê dujminên gelên Iraqê ye dujminê gelên Rojhilata Navîn e lewma Îranê dê di şerê DAIŞê de pişta gelên Iraqê bigire.

Mihemed Cevad Zerîf diyar kir ku ew hêvîdar in nakokiyên navbera Hewlêr û Bexdayê bên çareserkirin û got, her cure rêkeftina ku di navbera her du aliyan de çêbibe emê piştgirî bikin.

Piştî Zerîf, Barzanî axivî û ragihand, Îran yekemîn welat bû ku di şerê li dijî DAIŞê de çek û alîkarî da Herêma Kurdistanê.

Barzanî her wiha got, ji bo me şerefek mezin e ku DAIŞ li ser xaka Kurdistanê ji nav here.

Li ser îdia û nûçeyên ku dibêjin, bendava Mûsilê dîsa ketiye destê DAIŞê û 200 pêşmerge jî dîl ketine destê çekdarên DAIŞê, Barzanî got, ew nûçe û îdia hemû derew in. Bendava Mûsilê di bin kontrola hêzên Pêşmerge de ye.

Rudaw