Li gorî agahiyan, dewleta Sûriyê niha mijûlî lêkolînê li ser wê yekê ye ku di hikûmeta nû de wezaretekê jî bide kurdan.

Tê gotin, di pêkhateya hikûmeta nû ya Sûriyê de dê wezîrekî kurd jî hebe û parlamenterê kurd Omer Osê namzedê wergirtina wê wezaretê ye.

Endamê kurd ê Parlamentoya Sûriyê Omer Osê ji Rûdawê re axivî û ev yek piştrast kir.

Omer Osê got, Serokwezîrê Sûriyê Waîl Hilfî ku erkdarê avakirina hikûmeta nû ye, beriya 10 rojan gazî min kir û ji min re got, em dixwazin kurd jî di kabîneya hikûmeta nû de beşdar bibin.

Osê da zanîn, Hilfî jê re gotiye ku tu jî yek ji namzedên kabîneya nû yî û wiha axivî: ”Min jî jê re got beşdarbûna kurd di hikûmetê de gaveke girîng a dewletê ye ku ji bona kurdan davêje.”

Wî parlamenterê kurd ê Sûriyê di berdewamiya daxuyaniya xwe de ragihand, wî ji Walî Hilfî re gotiye ku ew hez dike yek ji wezaretên Rewşenbîrî, Tûrîzm, Lihevanîna Niştimanî û Karûbarên Civakî bidinê.

Omer Osê anî ziman ku tê pêşbînîkirin ku kabîneya hikûmeta nû ya Sûriyê di nav 24 saetên bê de zelal bibe.

Rudaw