Wezîrên Kurd êdî li beramber Nûrî Malikî bêdeng nabin
Cigirê Serokwezîrê İraqê Roj Nûrî Şaweys got: ‘’Daxwiyaniya doh a Serokwezîrê İraqê Nûrî Malikî dijî hemû pêkhate û prensîbên bihevrejiyanê ye li İraqê, di heman demê de gefeke mezin e jî bo ser hemûyan.’‘
Hêjayê gotinê ye piştî wê daxwiyaniya tehdîdwarî ya doh a Malîkî, Serkirdayetiya Herêma Kurdistanê biryar da ku hemû wezîrên Kurd ji Bexdayê vekişin û beşdarî civîna Ebcûmena Wezîrên İraqê nebin.
Derbarê boykotkirina rûniştinê Encûmena Wezîrên İraqê de jî Şaweys wiha axifî: ‘’Boykotkirina rûniştinan tê wateya nemana sebrê û pêşandana nerazîbûnê li beramber wan kar û daxwiyaniyên bê bingeh ên Nûrî Malikî.’‘
Serokwezîrê Iraqê Nûrî Malikî rexneyên giran li Herêma Kurdistanê girtibûn û gefa wê yekê xwaribû ku ew ranawestin heta navçeyên ji bin destê wan hatine derxistin, venegerînin. Nûrî Malikî di gotara xwe ya heftane de gotibû: “Em nikarin li hember wê yekê bêdeng bin ku Hewlêr bibe binkeyê Baas û DAİŞ’ê.”
Serokatiya Herêma Kurdistanê jî bersiva daxwiyaniya Malikî da û ragehand ku xelk ji ber dîktatoriyeta Malikî reviyane û hatine Hewlêrê. Berdevkê Serokatiya Herêma Kurdistanê got ku Malikî bi nexweşiya Hysteria ketiye û hevsengiya-tewazûna xwe wenda kiriye.
Ji aliyê xwe ve Parlamentoya Kurdistanê jî bersiva daxwiyaniya doh a Serokwezîrê İraqê Nûrî Malikî da û ragehand ku ancex bi diyalogê pirsgirêk tên çareser kirin ne bi gef û tehdîdan.
Basnews
