Bi mebesta xurtkirina peywendîyên aborî û bazirganî di navbera herêma Kurdistanê û Brîtanyayê de şandeke bazirganîya Brîtanyayê serdana herêma Kurdistanê kiriye û li dîwana wezareta aborî û darayîya Kurdistanê li gel Bayiz Talebanî wezîrê aborî û darayîya Kurdistanê kom bû.


Di evê dîdarê de ku birîkarê wezareta darayîya herêma Kurdistanê Reşîd Tahir amade bû. Wezîrê aborî û darayîya Kurdistanê Bayiz Talebanî basa bûdce û çawanîya amadekirina bûdceya herêma Kurdistanê kir û amaje bi wêrankarîya jêrxana aborîya Kurdistanê û komkujîyên dij bi Kurd ên weke proseyên Enfal û kîmyabaranan ji alîyê rejîma Beis a herifî ve kir.

Wezîrê aborî û darayîya hikûmeta herêma Kurdistanê herwiha basa hewlên hikûmeta Kurdistanê bo dubare vejandina jêrxana aborîya herêma Kurdistanê kir ku niha di jêr sîbera aramî û tenahîya asayişê, herêma Kurdistanê vejîn û avaedankirinê bi xwe ve dibîne û projeyên stratejîk têde dihên cîbicîkirin.

Di heman dîdarê de birîkarê wezareta aborî û darayî Reşîd Tahir jî amaje bi giringîya vekirina bankan li herêma Kurdistanê kir bi taybetî di dema niha de ku bi hezaran kompanîyên bîyanî û navxwe li herêma Kurdistanê di buwarên cuda cuda de weberhênan û projeyên stratejîk encam didin.

Di beşeke din a evê kombûnê de kompanîyên Brîtanyayî amadeyîya xwe bo beşdarbûn di proseya avedankirin û weberhêna li Kurdistanê de nîşan dan.