لە شاری كەركووك باوكێك دەستدرێژیی سێکسیی کردووەتە سەر دوو كچی و خۆی و سەرچاوەیەكی ئەمنیش هەواڵەكە پشتڕاست دەكاتەوە و دەڵێت دەستگیر کراوە.

لەمبارەیەوە، سەرچاوەیەكی ئەمنی لە شاری كەركووك كە نەیویست ناوی ئاشكرا بكەین ڕایگەیاند: "لە شاری كەركووك، باوكێك دەستدرێژیی سێكسیی كردووەتە سەر دوو كچی خۆی، دوێنێ یەكشەممە 13/9/2020 لەلایەن پۆلیسەوە ئەو باوكە دەستگیر كراوە".

گوتیشی: "ئەمە تاوانێكی گەورەیە و لە شاری كەركووك ڕووی داوە و كچەكانی ئەو پیاوە ئێستا لە دۆخێكی ناهەمواردا دەژین و دوای ئاشكرابوونی ئەو كردەوەیە باسیان لەوە كردووە كە بەنیازن كۆتایی بە ژیانی خۆیان بهێنن و باوكیان دانی بەو تاوانە قێزەونەدا ناوە و دوای لێكۆڵینەوەكان ڕادەستی دادگای لێكۆڵینەوەی شاری كەركووك دەكرێت".

بەپێی زانیارییەكان ئەو بنەماڵەیە عەرەبن و دانیشتووی شاری كەركووكن و پیاوەكە تەمەنی 45 ساڵە، دوای ئەوەی یەكێك لە كچەكانی لە دەستی هەڵدێت پۆلیس باوكی دەستگیر دەكات و پاشان حاڵە‌تەكە ئاشكرا دەبێت.

لەو چوارچێوەیەدا، ئەمڕۆ دووشەممە 14/9/2020، شۆخان محەمەد، توێژەری كۆمەڵایەتی، لە كۆمەڵەی هیوا بۆ مافەكانی ئافرەتان لە كەركووك، ڕايگەیاند: "حاڵەتێكی قێزەون لە شاری كەركووك رووی داوە كە ئەویش بریتییە لەوەی باوكێك دەستدریژیی كردووەتە سەر دوو كچی و ئێمە لەو بارەیەوە ئێستا خەریكی كۆكردنەوەی زانیارین لەسەر ئەو حاڵەتە".

گوتیشی: "ئێمە وەكوو كۆمەڵەكەمان بەرگری لەو دوو كچە دەكەین كە بوونەتە قوربانی و پێویست بكات پارێزەریشیان بۆ دابین دەكەین".












باسنيوز