سەرۆکى لیژنەى کاروبارى پێشمەرگە لە پەرلەمانى کوردستان رایگەیاند دەزگاى نیشتیمانى پێشمەرگە ژمارەیەکى زۆر واژووى کۆکردووەتەوە بۆ دەستنیشانکردنى رۆژێک بۆ رۆژى نیشتیمانى پێشمەرگە، ئێمەش پێشنیازمان کردووە 11/9 کە ساڵڕۆژى هەڵگیرساندنى شۆڕشى ئەیلوولە بکرێتە رۆژى جیهانى پێشمەرگە.

رێڤینگ هرورى، سەرۆکى لیژنەى پێشمەرگە لە پەرلەمانى کوردستان راگەیاند: "چەندین پێشنیاز لەلایەن دەزگاى دەزگاى نیشتیمانى پێشمەرگە و کۆمەڵەى پێشمەرگە دێرینەکان و دەزگاى باڵاى ئەیلولەوە بۆ پەرلەمان رەوانە کراوە، بۆ دەستنیشانکردنى رۆژی نیشتیمانى پێشمەرگە کە شایستە بە ماندووبوون و قوربانیدانى پێشمەرگە بێت".

راشیگەیاند: "ئێمە بۆچوونى خۆمان لەمبارەیەوە داوە و پێمان باشە ١١ی ٩ى هەموو ساڵێک کە ساڵڕۆژى هەڵگیرساندنى شۆڕشى ئەیلوولە، بکرێتە رۆژى نیشتیمانیى پێشمەرگە، چونکە شۆڕشى ئەیلول تاکە شۆڕشى سەرتاسەرى بوو لەوکاتە کە توانى بووى سەرجەم چین و توێژ و لایەنە جیاجیاکانى هەرچوارپارچە لە باشور کۆبکاتەوە، بەسەرجەم بۆچوونە جیاجیاکان، هیوادارین ئەمە بەسیاسى نەکرێت چونکە شۆڕشى ئەیلوول شۆڕشێکى سەرتاسەرى بوو".

ئاماژەى بە ئەوەش کرد" سەرجەم سەرکردە باڵاکانى ئێستاى گۆڕەپانى سیاسى و ئیسلامى و عەلمانى و چەپەوە، کە ئێستا لە گۆڕەپانى سیاسى کوردستاندان، کادیر و پێشمەرگە و سەرکردەى دیارى شۆڕشى ئەیلول بوون، بۆیە ئێمە پێمان باشە ئەورۆژە دەستنیشان بکرێت بە رۆژى نیشتیمانى پێشمەرگە".





باسنیوز