سەرۆکی لێژنەی ناوچە كوردستانییەكانی دەرەوەی ئیدارەی هەرێم لە پەرلەمانی كوردستان ئاشکرای کرد لە سەرەتای هەفتەی داهاتوودا كۆبوونەویەك ساز دەکەن و بانگهێشتی جێگری پارێزگاری نەینەوای كردووە بۆ ڕوونكردنەوەی چەندین بابەت كە تایبەتن بە خەڵكی شنگال.

لەمبارەیەوە جوان یوونس ڕۆژبەیانی، سەرۆكی لێژنەی ناوچە كوردستانییەكانی دەرەوەی ئیدارەی هەرێمی کوردستان لە پەرلەمانی كوردستان ڕايگەیاند: "بڕیارە لە سەرەتای هەفتەی داهاتوودا بانگهێشتی سیروان ڕۆژبەیانی جێگری پارێزگاری نەینەوا بکەین و دێتە پەرلەمان بۆ گفتۆگۆكردن لەسەر چەند بابەتێكی پەیوەست بە ناوچە كوردستانییەكانی دەرەوەی ئیدارەی هەرێم و بەتایبەت قەزای كە سەر بە پارێزگای نەینەوایە".

ئەو پەرلەمنتارە گوتیشی: "ڕاستە مووسڵ و قەزای شنگال لەڕووی ئیدارییەوە سەر بە هەرێمی كوردستان نین، بەڵام چونکە لە ناوچە کوردتانییەکان هەڵکەوتوون و ئەوانیش لەسەر ناوچە كوردستانییەكان چەندین لێژنەیان دروست كردووە بۆ پارێزگای نەینەوا و قەرەبووی زیانلێكەوتوانی کوردانی ئێزدییەكان و شنگال بکەنەوە وە هەندێك كێشە و گرفت هەیە سەر بە پارێزگای نەینەوایە كە ئەوان وەك پارێزگا دەتوانن چارەسەری بكەن".

جوان ڕۆژبەیانی ڕاشی گەیاند: "لە تەوەرێكی تری ئەو کۆبوونەوەیەدا دەمانەوێت بزانین ئەو لێژنەی كە ئەوان دروستیان كردووە لەسەر چ بنەمایەک دروست كراوە و ئالیەتی كاركردنیان چۆنە بۆ قەرەبووكردنەوە و دەمانەوێت هەماهەنگییەك هەبێت لە نێوان پەرلەمان و جێگری پارێزگاری نەینەوا بۆ ئەوەی لە داهاتوودا بتواین لە ناوچەكانی دەرەوی ئیدارەی هەرێم لە سنوری پارێزگای نەینەوا كێشەكان چارەسەر بكەین".












باسنيوز