ئێوارەی ئەمڕۆ یەكشەممە گوتەبێژێكی هاوپەیمانیی نێودەوڵەتیی شەڕی دژی ڕێكخراوی تیرۆریستیی داعش لە كۆنگرەیەكی رۆژنامەوانیدا باسی لە پێكهێنانی چوار ناوەندی هاوئاهەنگی لە نێوان پێشمەرگەی كوردستان و سوپای عێراق كرد بۆ ناوچە كوردستانییەكانی دەرەوەی ئیدارەی هەرێمی كوردستان.


مایڵز كەیگینز گوتەبێژ بە ناوی هاوپەیمانیی نێودەوڵەتیی لە كۆنگرەیەكی رۆژنامەوانیدا لە هەولێر دووپاتی كردەوە كە هەردوو وەزارەتی پێشمەرگە و وەزارەتی بەرگریی عێراق گەیشتوونەتە ڕێككەوتن لەسەر پێكهێنانی چوار ناوەندی هاوئاهەنگیی هاوبەش لە ناوچە كوردستانییەكانی دەرەوەی ئیدارەی هەرێمی كوردستان.


گوتیشی لە ماوەی چەند هەفتەی رابردوودا مەسرور بارزانی سەرۆك وەزیرانی هەرێمی كوردستان و مستەفا كازمی سەرۆك وەزیرانی عێراقی فیدراڵ چەند بابەتێكیان تاوتوێ كردووە، لە ناویشیاندا هاوئاهەنگی هاوبەش لە نێوان پێشمەرگە و سوپای عێراقدا، ئەمەش لە پێناو پڕكردنەوەی ئەو بۆشاییە ئاسایشیەی لە ناوچە كوردستانییەكانی دەرەوەی ئیدارەی هەرێمی كوردستان دروست بووە.











باسنيوز