دوای تێپەڕبوونی زیاتر لە ١٠ مانگ بەسەر گیان لەدەستدانیدا لە ئەنجامی هێرشێكی فڕۆكە جەنگییەكانی توركیا، پارتی كرێكارانی كوردستان (پەكەكە) گیان لەدەستدانی فەرماندەیەكی خۆی ڕاگەیاند.

میدیای فەرمیی پەكەكە راگەیاندراوێكی بە ناوی (كۆمیتەی پشتگیری خانەوادەی شەهیدانی پەكەكە) بڵاو كردەوە و تێیدا گیان لەدەستدانی عەبدولرەحمان حەمۆ ناسراو بە (دۆزدار حەمۆ)ی لە مانگی ١١ی ساڵی ٢٠١٩ راگەیاند و جەختی كردەوە كە لە ئەنجامی هێرشێكی ئاسمانیی سوپای توركیا لە قەندیل كراوەتە ئامانج.

هاوكات تازە سەرەخۆشی لە بنەماڵەی دۆزدار حەمۆ و دۆستانی و لایەنگرانی پەكەكە كراوە.

دۆزدار حەمۆ لە ١٩٦٩ لە شاری عەفرینی ڕۆژئاوای كوردستان لەدایك بووە، لە ساڵی ١٩٩٠ەوە پەیوەندی بە ڕیزەكانی پەكەكە كردووە و بە فەرمی لە ١٩٩٢ەوە لە قەندیلە. ماوەیەكی زۆر فەرمانگەی سەربازی و بەڕێوەبەری ناوەندی ڕاگەیاندن و چاپەمەنیی هێزەكانی پاراستنی گەل (هەپەگە) باڵی سەربازیی پەكەكە بووە و لە كاتی شەهیدبوونیشیدا فەرماندەیەكی سەربازیی پەكەكە بووە.











باسنيوز