بەهۆی بەرزبوونەوەی پلەکانی گەرما و كەمیی كارەبای نیشتمانی، لە چەند گەڕەكێكی شاری هەولێر كێشەی كەمیی ئاو سەری هەڵداوە و بەڕێوبەری ئاوی هەولێریش هۆکارەکەی بۆ کەمیی کارەبای نیشتمانی دەگەڕێنێتەوە ڕای دەڵێت پێویستە ڕۆژانە 12 تا 14 كارەبای نیشتمانی هەبێت.

ئاری محەمەد، بەڕێوبەری ئاوی هەولێر ڕایگەیاند: "لەگەڵ هاتنی وەزری گەرما، كەمبوونی ئاو لە چەند گەڕەكێكی شاری هەولێر، گرفتی بۆ هاووڵاتیان دروست كردووە و ئەمەش هۆكارەكەی دەگەڕێتەوە بۆ كەمیی پێدانی كاژمێرەكانی كارەبا كە بە شێوەیەكی پچڕ پچڕ هەیە".

بەڕیوەبەری ئاوی هەولێر ڕاشی گەیاند: "بەهۆی بوونی زۆرێك لە باخچەكانی پێش ماڵان لە گەڕەكەكان هاووڵاتیان بە شێوەیەكی ناڕێك ئاوی ئەو باخچانە دەدەن و ئەمەش وا دەكات كە ئاو بۆ ماڵەكانی دوای خۆیان نەچێت و نەبوونی تەوافە و پێوەری ئاویش ئەمەش كێشەی دروست كردووە".

ئاری محەمەد گوتیشی: "بۆ چارەسەركردنی ئەم دۆخە نابێت كارەبا بە شێوازی پچڕپچڕ بێت و پێویستە ڕۆژانە 12 تا 14 كاژمێر كارەبای نیشتمانی هەبێت، چونكە هەر جارێك كارەبا دەبڕێت، وا دەكات بیرەكان لە سفرەوە دەست پێ بكەنەوە و بوونی ئەو باخچانەش لە گەڕەكەكان گرفتن، چونكە زیان بە گەیاندنی ئاوی پاک و خواردنەوە دەگەیەنن و نووسراویشمان بۆ وەزارەتی شارەوانیش كردووە بۆ هەڵگرتنی ئەم باخچانە".













باسنیوز