گوتەبێژی بەڕێوەبەرایەتیی پۆلیسی سۆران ڕای گەیاند لە ئەنجامی كێشەیەكی كۆمەڵایەتی لە گوندی كەژەك سەر بە ناحیەی سیدەكان لە دەڤەری سۆران شەڕەتەقە دروست بووە و بەو هۆیەوە سێ کەس گیانیان لەدەست داوە و دوو کەسی دیکەش بریندار بوون.

لەمبارەوە موقەدەم شیمال دێواری، گوتەبێژی بەڕێوەبەرایەتیی پۆلیسی سۆران، رایگەیاند: "بەیانی ئەمڕۆ سێشەممە 23/6/2020 ئاگادار كراینەوە كە بەهۆی كێشەیەكی كۆمەڵایەتی لە گوندی "كەژەك"ی سەر بە ناحیەی سیدەكان، شەڕەتەقە دروست بووە، بەداخەوە بەپێی زانیارییەكان گوایە لەم شەڕەدا كوژرا و بریندار هەیە و هێزە ئەمنییەكان بۆ كۆنتڕۆلكردنی باردۆخەكە گەیشتوونەتە شوێنەكە".

گوتەبێژی بەڕێوەبەرایەتیی پۆلیسی سۆران گوتیشی: "بە داخەوە لەم رووداوە تا ئێستا 3 كەس كوژراون و 2 كەسیش بریندار بوونە و بریندارەکان بۆ چارەسەركردن گەیاندراونەتە نەخۆشخانە، چەند كەسێكیش بەهۆی شەڕەكەوە دەستگیر كراون".












باسنیوز