كەمێك پێش ئێستا د.جوتیار عادل گوتەبێژی فەرمیی حکوومەتی هەرێمی کوردستان راگەیەندراوێكی لەبارەی بۆردومانەكانی توركیا بۆ سەر ناوچە سنوورییەكانی هەرێمی كوردستان بڵاوكردەوە.


لە راگەیەندراوەكەدا هاتووە "بە دڵگرانى و نیگەرانییەکى زۆرەوە چاودێرى رووداوەکانى ئەمڕۆ و چەند رۆژى رابردووى ناوچە سنوورییەکان دەکەین، کە بووه هۆی گەياندنى زیانى گیانی و ماددى بە هاووڵاتییانی سڤیل و گوندنشینانى ئەو ناوچانە".

گوتەبێژی فەرمیی حكوومەتی هەرێمی كوردستان رایگەیاندووە "حكوومەتى هەرێمى كوردستان سەرکۆنەی شەهیدکردن و زیانگەیاندن بە هاووڵاتییان دەکات لەلایەن هەر لایەنێک و بە هەر هۆکارێک بێت. داوا لە کۆماری تورکیا دەکەین ڕێز له سەروەری خاك و نيشتيمانمان بگرێت و پەکەکەش پێویستە ئەو ناوچانە چۆڵ بکات تا چیتر نەبنە هۆکار بۆ دروستکردنى پشێوى لە ناوچە سنوورییەکانى هەرێمى کوردستان".


دەشڵێ "حکوومەتى هەرێمى کوردستان خوازیارى پەیوەندیى دۆستانەیە لەگەڵ وڵاتانى دراوسێ و نایەوێت لەناو خاکى هەرێمى کوردستان هێرش بکرێتە سەر هیچ وڵاتێک. لێرەشەوە پرسە و سەرەخۆشی لە کەسوکاری قوربانیان دەکەین و هیواى چاکبوونەوەش بۆ برینداران دەخوازین".










باسنيوز