ئەمڕۆ دووشەممە لە شاری كەركووك، هێزە ئەمنییە سەپێندراوەكان، بە زەبری هێز بڵاوەیان بە گردبوونەوەیەكی هاووڵاتیانی گەڕەکی قادسیە كرد كە ماوەی زیاتر لە مانگێكە بێ ئاوی خواردنەوەن.

ئیحسان شەریف، هاووڵاتییەكی دانیشتوی گەڕەكی قادسیەی شاری كەركووكە و بەشداربووی گردبنەوەكە بووە، ڕايگەیاند: "ئێمە وەكوو دانیشتوانی گەڕەكی قادسیەی شاری كەركووك، زیاتر لە مانگێكە ئاوی خواردنەوەی ماڵانمان بڕاوە و چەند جارێك داوامان لە لایەنە پەیوەندیدارەكان كردووە بۆ ئەوەی ئەو كێشەیەمان بۆ چارەسەر بكەن، بەڵام بەم وەزری گەرمایە بەدەم داواكەمانەوە نەهاتن، بۆیە ئەمڕۆ دووشەممە 8/6/2020، گردبوونەوەیەكمان ساز کرد لە دژی نەبوونی ئاوی خواردنەوە لە گەڕەكەكەمان".

گوتیشی: "ئێمە لە كاتێكدا داوای مافی خۆمان دەكەین، كەچی هێزێكی سەر بە لیوای 61ی حكوومەتی عێراقی هاتنە سەرمان و بە زەبری هێز بڵاوەیان بە گردبوونەوەكمان كرد، ئێستاش نازانین پەنا بۆ كام لا ببەین".

چەند گەڕەكێكی دیكەی شاری كەركووكیش هەمان كێشەی نەبوونی ئاوی خواردنەوەیان هەیە و لایەنە پەیوەندیدارەكانیش وەڵامی هاووڵاتیان نادەنەوە و ئەرکی خۆیان جێبەجێ ناکەن.













باسنيوز