پشتی كو رێكەفتێ 29/5/2020 ، كەسەك خەلكێ‌ كۆمەلگەها (دومیز) ل سنورێ‌ قەزا سێمێلێ‌ سەر ب پارێزگەها دهۆكێ‌ ڤە توشی ڤایرۆسێ‌ كۆرۆنایێ‌ بوو، رێڤەبەرێ‌ ساخلەمیا قەزا سێمێلێ‌ ئاشكرا دكەت كو حالەتێن كۆرۆنایێ‌ ل دهۆكێ‌ بەرەڤ زێدەبوونێ‌ دچن و ئەڤرۆ دێ‌ چەند حالەتێن دی هێن راگەهاندن كو بەركەفتیێن ئەوی كەسی نە.

د.بەهائەدین بشار، رێڤەبەرێ‌ ساخلەمیا قەزا سێمێلێ‌ دیاركرن: "ل رێكەفتی 25/5/2020 زەلامەك خەلكێ‌ قەزا سێمێلێ‌ یە، ل بەغدا ڤەگەریایە هەرێما كوردستانێ‌ و گەهشتیە ناڤا دهۆكێ‌ و ب رەنگەكێ‌ (نە شەرعی) هاتیە ناڤا دهۆكێدا و پشتی كو قەستا مالا خۆ كری، نیشانێن كۆرۆنایێ‌ لنك دیار بوونە و قەستا برینپێچەكێ‌ كریە و ب تەمامی نیشانێن كۆرۆنایێ‌ لێ‌ دیار بوونە، پاشان پشكنینێن كۆرۆنایێ‌ بۆ هاتینە ئەنجامدان و ل رێكەفتێ 29/5/2020 دیار بوویە كو هەلگرێ‌ ڤایرۆسێ‌ كۆرۆنایێ‌یە".

رێڤەبەرێ‌ ساخلەمیا قەزا سێمێلێ‌ ئەو چەندە ژی گۆت: "ئەو كەسە ب رەنگەكێ ‌(نە شەرعی و نە یاسایی) هاتیە ناڤا پارێزگەها دهۆكێ‌ دا و ئەو كەسێ‌ تووشی كۆرۆنایێ‌ بووی، تێكهەلی و هاتنوچوونەكا باش و زێدە ئەنجام دایە و ئەڤ چەندە مەترسیە ل سەر كەسێن دەوروبەرێن وی و گۆت ژی: "ژ بەر كو ئەو كەسە ب نە (یاسایی) هاتیە ناڤا دهۆكێ‌ دا و هاتنوچوون ئەنجام دایە و سەرەدانێن كەسوكاران ژی ئەنجام داینە و مە گومان تێدا نینە كو (100%) ئەڤرۆ (3 تا 4) كەسێن دی كو كەسێن دەوروبەرێن وی نە، دێ‌ هێنە راگەهاندن كو توشی كۆرۆنایێ‌ بونە. میناهەڤژین و دایك و برا كو پشكنین بۆ هاتینە ئەنجامدان. مە گومان نینە كو ئەو ژی توشی كۆرۆنایێ‌ بوونە و ب رێژا (100%) پێشبینی دكەین ئەڤرۆ (3 تا 4) حالەتێن دیتر یێن ڤایرۆسێ‌ كۆرۆنایێ‌ بهێنە راگەهاندن. ب دلگرانی ڤە ئەو كەسێ‌ ب نە یاسایی ژ بەغدا گەهشتیە ناڤا دهۆكێ‌ گەلەك سەرەدان ئەنجام داینە".

ناڤبری ئاماژە ب وێ‌ چەندێ‌ ژی دا: "ئەم مەترسیێ‌ ل سەر دهۆكێ‌ دبینین چونكە دهۆك هەمو رویەكێ‌ ڤە خودان مەترسی یە هەم روویێ‌ ناڤەراست و دەڤەرێن عێراقێ‌ و هەم توركیا چونكە هەر كەسەكێ‌ ب قاچاخی بهێتە ناڤا دهۆكێ‌ دێ‌ مەترسیێن مەزن ل سەر ژیانا خەلكی دروست كەن".













باسنیوز