فڕۆكه‌ بێ فڕۆكه‌وانه‌كانى توركیا له ‌گوندى سه‌فره‌ى ناوچه‌ى (ماوه‌ت)ى سه‌ر به‌ پارێزگاى سلێمانى، ئۆتۆمبێلێكى په‌كه‌كه‌ ده‌كه‌نه‌ ئامانج و به‌هۆیه‌وه‌ پێنج چه‌كدارى په‌كه‌كه‌ گیانیان له‌ده‌ست دا.

كامه‌ران حه‌سه‌ن، قایمقامى شارۆچكه‌ى ماوه‌ت ڕايگه‌یاند: "شه‌وى ڕابردوو 26/5/2020، له‌لایه‌ن فڕۆكه بێ فڕۆكه‌وانه‌‌كانى توركیاوه‌، ئۆتۆمبێلێكى په‌كه‌كه‌ له‌ناو گوندى سه‌فره‌ بۆردومان كرا، به‌م هۆیه‌وه‌ پێنج چه‌كدارى په‌كه‌كه‌ گیانیان له‌ده‌ست دا".

ئاماژه‌ى به‌وه‌ش كرد: "بۆردومانه‌كه‌ى فڕۆكه‌كانى توركیا دوو مووشه‌ك بووه‌، مووشه‌كێك به‌ر ئۆتۆمبێله‌كه‌ى په‌كه‌كه‌ كه‌وتووه‌ و مووشه‌كێكى دیكه‌ به‌ر نه‌خۆشخانه‌یه‌كى گوندى سه‌فره‌ كه‌وتووه‌".

جگه ‌له‌وه‌ى له‌ بۆردومانه‌كه‌دا پێنج چه‌كدارى په‌كه‌كه‌ گیانیان له‌ده‌ست دا، به‌هۆى بۆردوومانه‌كه‌وه‌ زیانى داریی زۆر به‌ر چه‌ند ماڵێكى گونده‌كه‌ كه‌وتووه‌ و چه‌ند ماڵێكیش پارچه‌ى بۆدوومانه‌كه‌یان به‌ركه‌وتووه‌.

ئه‌مه‌ له‌كاتێكدایه‌ ئه‌مڕۆ چوارشه‌ممه‌ 27/5/2020، وه‌زاره‌تى به‌رگریى توركیا ڕای گه‌یاند: "فڕۆكه‌ بێ فڕۆكه‌وانه‌كانى توركیا له‌ ناوچه‌ى ئاسۆسی سه‌ر به‌ شارۆچكه‌ى ماوه‌ت، پێنج چه‌كدارى په‌كه‌كه‌یان كردووه‌ته‌ ئامانج".













باسنيوز