رێڤه‌به‌رێ وه‌به‌رهێنانا پارێزگه‌ها دهۆكێ باس ل جیبەجیكرنا (٢٣٩) پرۆژێن جوراو جور دکەت کو دێ ل سەرانسەری پارێزگەھا دھۆکێ ھێنە ئەنجامدان.

كوردۆ ئێحسان، رێڤه‌به‌رێ وه‌به‌رهێنانا پارێزگه‌ها دهوكێ دیاردكه‌ت و د بێژیت:ژ چارچوڤێ خو ئاماده‌كرن ژ بۆ (ماسته‌ر پلانێن وه‌به‌رهێنانێ) ل هه‌رێما كوردستانێ ب گشتى و پارێزگه‌ها دهۆكێ ب تایبه‌تى، مه‌ ب هه‌ماهه‌نگیا هه‌مو قه‌زا و ناحیان ل سه‌رانسه‌رى پارێزگه‌هێ پلانه‌ك دانایه‌ كو بزانین ل هه‌مو قه‌زا و ناحیان چ (پرۆژه‌) وان پێتڤى پێ هه‌یه‌ و چه‌ندین دانوستاندن مه‌ ئه‌نجام داینه‌ و بۆچونێن خه‌لكێ ژى هه‌لبه‌ت هاتنه‌ وه‌رگرتن، و ده‌رئه‌نجامێ ڤان دانوستاندنان بۆ مه‌ دیار بوویه‌ كو ل قه‌زایان ئه‌م بشێن هند كاران بكه‌ین كو خزمه‌تا خه‌لكێ بكه‌ن. گۆت ژى: ل هه‌ر قه‌زایه‌كێ دێ هه‌مى داتا و پێزانین گه‌هنه‌ مه‌ كو خه‌لكێ پێتڤى ب چ پرۆژه‌ هه‌یه‌.

رێڤه‌به‌رێ وه‌به‌رهێنانا پارێزگه‌ها دهۆكێ ئه‌و چه‌نده‌ گۆت: هه‌ر وه‌به‌رهێنه‌ره‌ك بشێت ل قه‌زا وناحیان كار بكه‌ت دێ ئه‌م رێخۆشكه‌ر بین، و ب هه‌مو شیان ڤه‌ د خزمه‌ت دا بین ، و بۆ ئه‌ڤێ قوناغێ(239) پرۆژێن وه‌به‌رهێنانێ دێ ل سه‌ر ئاستێ پارێزگه‌هێ مینا قه‌زا و ناحیان ژى هێن ئەنجامدان. مینا پرۆژێن (چاندنی) و پرۆژێن گه‌شتیارى ل چه‌ندین ده‌ڤه‌رێن ژ ده‌رڤه‌ى باژێرى و گۆت ژى: ئه‌گه‌ر ئه‌ڤ پرۆژانە،‌ ئه‌وێن مه‌ به‌حس كرین، ده‌ست ب كارى بكه‌ن هه‌لبه‌ت لدیڤ وێ پێشبینیا مه‌ دیار كرى كو (200) هزار ده‌رفه‌تێن كارى دێ بۆ خه‌لكێ مه‌ دروست بن. ئه‌م چاڤه‌رێ دكه‌ین ل ده‌مه‌كێ نێزیك ئه‌ڤ پرۆژه‌یه‌ ده‌ست پێ بكه‌ن، و ب ئه‌ڤێ چه‌ندێ دێ ده‌لیڤێن كاركرنێ بو خه‌لكێ ژى دروست بن.

ناڤبرى ته‌كه‌ز ل سه‌ر وێ چه‌ندێ ژى كر: ئه‌م پشته‌ڤانیێ ل وێ چه‌ندێ دكه‌ین كو بۆ ئەنجامدانا ئه‌ڤان پرۆژه‌یان ، خه‌لكێ مه‌ بخۆ ل ناڤا وان پرۆژه‌یان كار بكه‌ت و هه‌لبه‌ت بۆ كاركرنا كرێكارێن بیانى یاسایه‌ك هه‌یه‌ كو رێژه‌یه‌كا دیار كرى یا كرێكارێن بیانى لسه‌ر هه‌ر پرۆژه‌یه‌كێ كار دكه‌ت و بۆ ئه‌ڤان پرۆژێن مه‌ به‌حس كرین ئه‌گه‌ر كرێكارێ ناڤخۆى كار بكه‌ت دێ پتر مفا هه‌بیت، هه‌م بۆ پرۆژه‌ى و هه‌م بۆ وه‌به‌رهێنه‌رى.










باسنیوز