بەرپرسێ‌ لێژنا پارتی دیموكراتی كوردستان ل پارێزگەها مووسل دیار كر كو ژبەر تیرۆرستێن داعش خەلكێ‌ گوندێن سەر مووسل ڤە گەفێن چۆلكرنا گوندێن خوە دكەن. دووڤ زانیاریان ژی گەلەك كەسان مالێن خوە ژ گوندان بۆ ناڤ باژێرێ مووسل ڤەگوهاستینە.

عەلی ملحم، بەرپرسێ‌ لێژنا پارتی دیموكراتی كوردستان ل پارێزگەها مووسل دیار كر كو: "گەلەك كەسان مالێن خوە ژ گوندان یێن ئیناینە ناڤ پارێزگەها مووسلێ‌ دا ژبەر گەفێن تیرۆرستێن داعش چونكو ل گوندێن سەر مووسل ڤە بتایبەتی ژی ئالیێ گەیارە و حەزەر و بەعاج ڤە لڤینێن داعش زێدەبووینە. هەتا ژی ئەڤە چەندین حالەتێن هێرشكرنێ‌ ژلایێ‌ تیرۆرستێن داعش ڤە چێبوون بۆ سەر گوند و جهێن لەشكەری ئەڤە بوویە جهێ‌ مەترسیێ بۆ وەلاتیان لەورا خەلك گەفێن چۆلكرنا گوندێن خوە دكەن".

خۆیا ژی كر كو: "ترسا خەلكێ‌ گوندێن مووسل د وێ‌ چەندێ دایە جارەكا دی‌ تیرۆرستێن داعش وەكو سالا 2014ێ‌ ڤەگەرن نها خەلك گەلەك ژ خوە دترسن بتایبەتی ژی پشتی تیرۆرستێن داعش هێرشی گوندێ‌ زلحەفە سەر ناحیا شۆرە ڤە نێزیك گەیارە سەر پارێزگەها موسل ڤە كرن دئەنجامدا موختارێ‌ گوندی برینداركرینە".











باسنیوز