مەحما خەلیل، قایمقامێ‌ قەزا شنگال دیار كر كو: "ئەڤە چەند سالن دەخلۆدانێ‌ جۆتیارێن شنگال ل سایلۆیا شنگال ناهێتە وەرگرتن دئەنجامدا ژی جۆتیارێن شنگال گەلەك زەرمەند دبن و نەشێن دەخلۆدانێ‌ خوە رەوانەی سایلۆیا تەلەعفەر و رەبیعە بكەن چونكو تووشی ئاریشەیان دبوون لەورا ب نڤیسارەكا فەرمی مە داخاز كریە ئەڤ سالە دەخلۆدانێ‌ جۆتیاران ل سایلۆیا شنگال بهێتە وەرگرتن، بۆ ڤێ‌ مەرەمی ژی دخوازا چێكرنا هژمارەكا گرۆپانان هاتینە كرن بۆ وەرگرتنا دەخلۆدانێ‌".

خۆیا ژی كر كو: "سایلۆیا شنگال هاتیە وێرانكرن، ئەم یێ‌ هەولدەن گرۆپان بهێنە بەرهەڤكرن بۆ وەرگرتنا گەنمی.‌ ئەم هیڤینە ئەڤ سالە ل شنگال دەخلۆدانێ‌ جۆتیاران بهێتە وەرگرتن".

غازی ئەلیاس، رێڤەبەرێ‌ سایلۆیا شنگال دیار كر كو: "بۆ چێكرنا گۆرەپانێن وەرگرتنا دەخلۆدانێ،‌ مە داخازا هاریكاری ژ مووسل كریە هەتا نۆكە ئەو هاریكاری‌ نەگەهشتیە مە. لێ‌ هەموو هەولدان یێن دهێنە كرن ئەڤ سالە هەتا چار گرۆپانان ل ناڤ سایلۆیا شنگال بهێنە دروستكرن بۆ وەرگرتنا دەخلۆدانی‌ داكو جۆتیارێن شنگال تووشی ئارشیەیان نەبن وەكو سالێن بۆری".

ئاشكەرا كر كو: "سایلۆیا شنگال شیانێن وەرگرتنا 60 هزار تەنێن دەخلۆدانی هەبوون لێ‌ ئەڤ چەند سالن سایلۆیا شنگال هاتیە وێرانكرن. هەتا نۆكە نەهاتیە نوژەنكرن. ئەم یێ‌ كار دكەین گرۆپان بۆ وەرگرتنا دەخلۆدانێ‌ ئەڤ سالە بهێنە دانان".











باسنيوز