دوو كچێن ئێزدی یێن ژ دەستێ داعش رزگاربووین گەهشتنە دهۆكێ
حسێن كۆرو قائێدی، بەرپرسێ نڤیسینگەها رزگاركرنا رەڤاندیێن ئێزدی گۆت:" دوو كچێن ئێزدی هاتبوونە رزگاركرن ئێك ژوان كچان بناڤێ ( رونیا فەیسەل مسكین) دژیێ 17 سالیێ دا ژ ناڤ كەمپا هۆلێ ل وەلاتێ سوریا هاتبوو رزگاركرن وكچا دی ژی ب ناڤێ ( لیلی مراد عیدۆ) ئەڤ هەردوو كچێن ئێزدی یێن خەلكێ شنگال ل جینوسایدا شنگال سالا 2014ێ ژلایێ تیرۆرستێن داعش ڤە هاتبوونە رەڤاندن تووشی هەموو جۆرێن زۆرداریێ بووینە و زمانێ خوە یێ دایكی ژی ژبیر كرینە ژبەر زۆرداریا تیرۆرستێن داعش بسەری ئینای. پشتی ئەڤ هەردوو كچانە هاتینە رزگاركرن ژبەر بارودخێ ڤێ دووماهیێ بۆ دەمێ چەند رۆژان ل وەلاتێ سوریا مابوون وپشتی مە نڤیسارەكا فەرمی دایە دەرگەهێ پیشابیری بۆ رێك پێ دانا كەس و كارێن وان بچن هەردوو كچان بینن، ئەڤرۆكە هەردوو كچ ب دیتنا خێزان و كەس و كارێن خوە شاد بوون".
خۆیا ژی كر كو: "تیرۆرستێن داعش شەش هزار و 417 كەسێن ئێزدی ل قەزا شنگال رەڤاندبوون. هەتا نۆكە مە شیایە زێدەتر ژ سێ هزار و 500 كەسان ژ هەردوو رەگەزان رزگاربكەن و هێشتا چارەنڤیسێ پتر ژ دوو هزار كەسان دیارنینە وهەولێن مە بەردەوامن بۆ رزگاركرنا هەموو رەڤاندیێن ئێزدی".
میر جەهوەر عەلی بەگ، وەكیلێ میرێ ئێزدیان بۆ كارۆبارێن پەیوەندیان راگەهاند ئەڤرۆ ل دەرگەهێ سێمالكا مە پێشوازی ل هەردوو كچێن رزگاربوویێن ئێزدی كر وگەهشتنە پارێزگەها دهۆكێ."
باسنيوز
