ئەمشەوی هەینی د. بەشیر حەداد جێگری سەرۆكی پەرلەمانی عێراق داوای لە مستەفا کازمی سەرۆك وەزیرانی عێراق كرد شایستە داراییەکانی ھەرێمی کوردستان و پارەی گەنمی جوتیاران بخاتە نێو کاری لە پێشینەی کابینەکەی.


نووسینگەی حەداد بڵاوی كردەوە كە جێگری سەرۆکی پەرلەمانی عێراق داوای لە سەرۆک وەزیرانی نوێی عێراق كردووە مووچەی فەرمانبەرانی ھەرێمی کوردستان و پارەی گەنمی جوتیارانی ھەرێمی کوردستان یەکێک بێت لە کاری لە پێشینەی کابینەکەی و کار بۆ جێبەجێکردنی ماف و داخوازییەکانی گەلی کوردستان بکات.


جێگری سەرۆکی پەرلەمانی عێراق لە کاتی پیرۆزباییکردن لە مستەفا کازمی بەبۆنەی متمانەپێدان بە کابینەکەی لەلایەن پەرلەمانەوە، داوای لێ کردووە ھەوڵ بۆ چارەسەرکردنی کێشەکانی نێوان ھەولێر و بەغدا بدات، کاریش بکات بۆ ئەوەی مووچەی فەرمانبەرانی ھەرێمی کوردستان لە کاتی خۆی بنێرێت و پارەی گەنمی جوتیارانی ھەرێمی کوردستانیش خەرج بکرێت.


لەلایەن خۆیەوە مستەفا کازمی وێڕای سوپاس و پێزانینی لە پشتیوانیکردن و متمانەپێدانی کابینەکەی، بەڵێنی دا ھەوڵی چارەسەرکردنی کێشەکان نێوان ھەولێر و بەغدا بەپێی دەستوور بدات و لەکاتی خۆیشیدا شایستە داراییەکانی ھەرێم بنێرێت و کاریش دەکات بۆ چارەسەرکردنی کێشەی پارەی گەنمی جوتیارانی ھەرێمی کوردستان.




باسنيوز