رایەکی دۆستانە...
ماوەیەکە ھەندێک نووسەر یا کەسانێک بەتایبەت کە لە سۆشیال میدیا دەنووسن، بێ رەچاوکردنی ھەستیاری بابەتەکە ھێرشدەکەنە سەر ئەم شار یان ئەو شار، کە ئەمەش جواب و جوابکاری دور لە مۆڕاڵی نووسین و راگەیاندنی لێدەکەوێتەوە..! نیشتمانی کوردستان بەھەموو پارێزگا و قەزا و ناحیە و گوندەکانیەوە پیرۆزە و جوانە، حەق نیە ململانێی سیاسی و جیاوازی لە بیروبۆچوون بگوڕدرێ بۆ دژایەتی و ناشرین باسکردنی ئەم شار و ئەوشار یاخود خەڵکەکەیان.
باشتروایە ئەوەمان قبوڵبێت کە کوردستان بیروبۆچوونی سیاسی جودا جودای تێدایە، ئەو بیروبۆچوونانەش بارگاوین بە ئایدۆلۆژیای جیاواز یا تێڕوانینی جیاواز، کەواتە ئاراستە و حزبی جیاوازیش دروستدەبن، بەڵام ئەوەی ھەموومان پێکەوە کۆدەکاتەوە بەرژەوەندییە باڵاکانی نەتەوە و نیشتمانەکەمانن کە نابێ لەسەریان جیاوازیمان ھەبێ. جیاوازیەکانیش لە چۆنیەتی چارەسەری کێشە و تەنگوچەڵەمەکان بۆ ئەم نەتەوە و نیشتمانە قابیلی مناقەشە و شیکردنەوەن و، دەکرێ بەھێمنی و بە نەفەسێکی کوردانە و دور لە ھەڵچوون و نەفەس تەنگی، بیروبۆچوونی بەرامبەر مناقەشەبکرێ و بە نەفەسێکی سەردەمی و باوەڕبوون بە رای بەرامبەر گفتوگۆی لەسەربکرێ.
بەشێنەیی گفتوگۆ و دەربڕینی را و بۆچوونەکان یاخود نووسینەکان، یارمەتی دەرن بۆ رێگا و چارەسەر دۆزینەوەی کێشە و قەیرانەکان، بەپێچەوانەوە بارودۆخەکە ئاڵۆزتر دەبێ و خەڵکی کوردستانیش نیگەران دەکرێ و سەرلێشێواویش دروستدەبێ و، رێگاچارەسەریەکانیش لە پەنای دەرھاویشتەی خراپی کردار و پەرچەکردارەکان وندەبن...