ژ ئەگەرێ كورۆنایێ كوردێن ئێزدی رێورەسمێن جەژنا سەرێ سالێ ناگێرن
كەریم سلێمان، راوێژكارێ ئەنجۆمەنێ روحانییا ئێزدیان د داخویانیەكێ دا دیاركرن: "یا خویا یە ل هەمو جیهانێ كوردێن ئێزدی ژ پێخەمەت پیرۆزكرنا رێورەسمێن جەژنا سەرێ سالێ هەر سال ل هەمو جیهانێ قەستا هەرێما كوردستانێ و پەرستگەها لالش دكر لێ كورۆنا بو ئەگەر كو ئەم كوردێن ئێزدی ئەڤ سالە ئەڤێ جەژنێ ل مال دەرباز بكەین و ب چ رەنگەكێ بەرهەڤ نینین ژ مال ب دەركەڤین".
راوێژكارێ ئەنجۆمەنێ روحانییا كوردێن ئێزدی ئەو چەندە ژی دوپات كر: "ئەنجام نەدانا ئەڤان رێورەسمان پێگیریا كوردێن ئێزدی یە بو بریارێن (حكومەتا هەرێما كوردستانێ) چونكە ئەم كوردێن ئێزدی ژی ب هەمو رویەكێ ڤە پابەندی رێنمایێن حكومەتا هەرێما كوردستانێ نە و ئەم خەلكێ خو هەردەم دوپات دكەین ئەڤ بریارێن حكومەتێ ئاراستە كری ژ پێخەمەت پاراستنا گیانێ مەیە".
ناڤبری ئەو چەندە ژى دا دیاركرن: "هەر سال ل 15 نیسانێ كو وەكە جەژنا كوردێن ئێزدی كو ب جەژنا (سەرێ سالێ) یە بەرنیاسە، ل دەمێ ئێڤاری ئەم هەمو كوردێن ئێزدی ل پەرستگەها لالش كوم دبوین و مە جەژنا هەڤدو پیرۆز كر".
راوێژكارێ ناڤبری ئەو چەندە نەڤەشارت:" ژ پێخەمەت ئەوێ چەندێ چ كوردێن ئێزدی ل 15/4 ل پەرستگەها لالش ئامادە نەبن و پابەندی رێنمایێن حكومەتێ بن، مە دگەل میرێ كوردێن ئێزدیان میر(حازم كورێ میر تەحسین بەگ)ی، پەیوەندی ئەنجام دایە و بەیانامەیە مە دەر كریە كو مە د بەیانناما بەلاڤ كری دا داخاز ژ خەلكێ خو یێ كوردێن ئێزدی كری یە كو هەمو ئەڤ سالە پابەندی رێنمایێن حكومەتا هەرێما كوردستانێ بن و ئەڤ سالە كو رێكەفتی 15/4 جەژنا سەرێ سالێ یا كوردێن ئێزدی یە ئەو قەستا پەرستگەها لالش نەكەن و ئەڤێ جەژنێ ل مال دەرباز بكەن".
دوماهی ئاخفتنا خو دا ، كەریم سلێمان، راوێژكارێ ئەنجومەنێ روحانییا كوردێن ئێزدی ئەو چەندە دوپاتكر:"هەلبەت هەمو سالان ل رۆژا ئەڤێ جەژنێ بهێنڤەدانەكا فەرمی یە كو ژلایێ حكومەتا هەرێما كوردستانێ ڤە هاتیە دەستنیشانكرن و گوت ژی: ئەڤ جەژنە ل رۆژەكێ بتنێ دهێتە ئەنجام دان و ل رۆژا جەژنێ هەمو جاران شەمالك دهاتن هەلكرن و مە كوردێن ئێزدی بو دەما چەندین دەمژمێران دەمەك خوش دەرباز دكر لێ ژ پێخەمەت پاراستنا ساخلەمیا خەلكی ئەم وەكە كوردێن ئێزدی ژی پابەندی رێنمایێن حكومەتا هەرێما كوردستانێ نە و مە بریار دایە ئەڤ سالە چ رێورەسمێن جەژنا سەرێ سالێ ل پەرستگەها لالش ناهێنە ئەنجام دان و هیڤیخوازین هەمو كەس پابەندی رێنمایێن حكومەتێ بن تا كو ئەڤ نەخوشیە زوترین دەم ل سەر وەلاتێ مەدا دەرباز ببیت".
باسنيوز
