پێشنیوەڕۆی ئەمڕۆ لە گەڕەکێکی شارەدێی گوڵاڵەی سەر بەقەزای خانەقین، بۆمبێک بە چەکدارێکی داعشدا تەقییەوە و بەو هۆیەوە هەردوو دەستی پەڕیوە.

خەلیل خوداداد، بەرپرسی کۆمیتەی گوڵاڵەی یەکێتیی نیشتیمانیی کوردستان، ڕايگەیاند: "پێشنیوەڕی ئەمڕۆ ۹/٤/۲۰۲۰ لە گەڕەکی (شەهیدان)ی شارەدێی گوڵاڵە لەنێو ماڵێکدا بۆمبێک بە هاووڵاتییەکدا تەقییەوە و بەو هۆیەوە هەردوو دەستی پەڕیوە".

گوتیشی: "هاووڵاتییەکە بە ڕەگەز عەرەبە و دانیشتووی گوندی (کەشکەوڵ)ی سەر بە شارەدێی قەرەتەپەیە و ئەو ماڵەش ڕووداوەکەی تێدا ڕوویداوە ماڵی خزمێکیان بووە".

ڕوونیشی کردەوە: "گومان دەکرێت ناوبراو چەکداری داعش بێت و بە مەبەستی تەقاندنەوەی بۆمبەکەی هێنابێتە شارەدێکەوە".

ئاشکراشی کرد: "سەرەتا ڕووداوەکە شاردراوەتەوە بۆ ئەوەی هێزە ئەمنییەکان پێیان نەزانن، بەڵام پاش ئاگادارکردنەوەیان لەلایەن هێزەکانی ئاسایشی نیشتیمانییەوە دەستگیر کراوە".












باسنيوز