قایمقامێ شنگال: ھاتنوچوونا خەلكێ بیانی مەترسییە ل سەر ژیانا خەلكێ شنگال
مەحما خەلیل، قایمقامێ قەزا شنگال دیار كر كو: "مە داخواز ژ ساخلەمیا مووسل و ئیدارا مووسل كریە هژمارەكا زالگەهێن تەندروستی ل دەڤەرا شنگال دانن بۆ پشكنینا وان كەسێن هاتن وچوونی بۆ شنگال دكەن چونكو راستی ژی رۆژانە خەلكەكێ بیانی ژ دەرڤەی سنۆرێ عێراقێ ژی هاتن وچوونێ بۆ شنگال دكەت. هەروەسا ژی ژلایێ تەلەعفەر ژی ڤە هاتن وچوون بۆ شنگال دهێتە كرن لەورا ئەم داخوازا وەرگرتنا پێرابوونێن توند ل دەڤەرا شنگال دكەین داكو خەلك مە یێ پاراستی بیت ژ مەترسیا كۆرۆنا".
خۆیا ژی كر کو: "هندەك پێرابوون لشنگال هاتینە وەرگرتن لی ئەم دخوازن باشتر پێرابوون بهێنە وەرگرتن هەتا نۆكە چوو حالەتێن كۆرۆنا ل شنگال نەهاتینە تۆماركرن. مە دڤێت پتر گرنگی ب ژیانا وەلاتیان ل ناڤ سەنتەرێ شنگالدا بهێتە دان".
ئەوژی گۆت: "هەموو كەمپێن ئاواران ل هەرێما كوردستانێ هاتینە كۆنترۆل كرن. ئەم سوپاسیا حكومەتا هەرێما كوردستانێ و دەزگەهێن ئەمنی و تەندروستی دكەین بۆ وێ گرنگیا مەزن یا كەمپان هاتیە دان پێخەمەت پاراستنا ژیانا خەلكێ شنگال دناڤ كەمپاندا".
باسنیوز
