ئەڤرۆ 29 سالیا سەرهلدانا پارێزگەها دهۆكێیە
ئازاد بۆتی، ئێك ژ بەشداربوویێن سەرهلدانا پارێزگەها دهۆكێ دیار كر كو ل: "وێ دەمێ مە نامەك بۆ هەڤال ( كەمال كەركۆكی) بەرپرسێ لقا ئێك ل وێ دەمێ دا شاند ئەم كۆمەكا هەڤالا بووین مە ڤیا پەیوەندی پێڤە بكەین. ل وێ دەمێ كەمال كەركوكێ نامەك بۆ مە شاند وگۆت نەهێن ئەم دێ ناڤ سەنتەرێ دهۆكێ دا پتر پێدڤی هەوە بن بۆ ئازادكرنا دهۆكێ و هەڤال هاتنە كۆمكرن وناڤێن نەهێنی بۆ مە هاتنە دانان ل ئێزگەهێ دەزگەهێ كوردستان توجیهات بۆ مە دهاتن مە كۆمبوونا خوە بۆ ئازادكرنا دهۆكێ دەست پێكرن. ژوانا ژی كۆمبوون دناڤ مالا مە دا هاتە كرن و كۆمبوونەك ژی دناڤ مالا دایكا حەلیمە دایكا شەهیدان هاتە كرن. ئەم كۆمەكا هەڤالان بوون وبەرنامێ سەرهلدانێ هاتە دارشتن".
ئاشكەرا كر كو: "ل وێ دەمێ وەسا بریار هاتە دان هەر هەڤالەك بچتە مالا مستشارەكێ ئەو مستشاربوون یێن هێزا چەكداری دەستێ وان دا. وەسا چێبوو ئەو جهێ بۆ مە هاتیە دەست نیشانكرن وەكو مەفرەزا بچینە وێدەر كەڤتە ناڤبەرا ئەمانا دهۆكێ و مالا عمەر خان رێكانی، نھا دبێژنێ تاخێ شەهیدان. وێ دەمێ مە چەند داخوازی ژ عمەر خان رێكانی كرن وی ژی هەڤكاریا مە كر. ئەم رێیا عەبدولا جەمیل رێكانی هەڤالێ من بوو، ئەم برێیا برایێ وی یێ مەزن عەبدولهادی و لەزگین وان چووینە مالا عمور خان ریكانی، وی ژی هەڤكاری بۆ سەرهلدانێ دگەل مە دا كر".
خۆیا ژی كر كو: "ل وێ دەمێ چەند مستەشار ل دهۆكێ بون هەڤالێن مە چوونە دەڤ و داخاز ژێ كرن یان دگەل مە دا سەهلدانێ بكەن یان ژی وەكو بێ لایەن مال دا بیت یان ژی دژی مە بیت هەلوەستێ خوە ئاشكرا بكەن. بۆ مێژوو ئەز بێژم دەمێ ئەز چوویمە مالا عمەر خان رێكانی وێ دەمێ گەلەك هەڤكاریا مە كر وگۆت ب زارۆكێن خوە ڤە ئەم یێ دگەل هەوە وپشتەڤانێ هەوە مە، لێ هێزا وی یا چەكدار ل شێلادزێ بوو وێ دەمێ هەموو هەڤكاریا مە كر. بەرێ ئەم دەست ب سەرهلدانێ بكەن ل بیرا منە ئیبراهیم عەلی ئامادەیا خوە نیشادابوو لایەكێ دهۆكێ خەما وی بیت بۆ ئازادكرنێ و خالد بانێ چووبوومە مالا وی، هەڤكاریەكا باش هەبوو لایەنێ ئەمانا دهۆكێ مابوو. مەزانی دێ شەرەكێ گران ل ئەمانا دهۆكێ روودەت وئەم 11 كەس بووینە یێن شەرێ ل دەستپێكی ئەم هەر 11 بریار بووینە بچینە سەر بانێ ئۆتێلا شیراتۆن لێ مە ئەو جه باش نەدیت لەورا مە بریارا گوهۆرینێ دا چونكو لایێ عەسكەری ڤە ئەو جه باش نەبوو".
ئازاد بۆتێ گۆت: "ئەم بشەڤ چووینە مالا (محەمەد خاج ئەمینی) خۆدی ژی رازی بیت بابێ سیابەندی ئەو ژی دگەل مە دا بوو. ئەم هەڤالێن دگەل مە ژی شەهید بەیار گەرماڤی و عەبدولعەزیز میكائیل و محەمەد كانیكێ ئەڤە شەهید بووینە ویێن ژیانێ دا ژی ماین ساخ، هەڤال لەزگین خەلیل پیرۆمەری و عابد نسری و محەمەد پیرۆمەری و سیبابەندێ محەمەد خاج ئەمین و عسمەت مەحمەد سەلیم یێ ناڤدار، ئەبو نوزو وچار برایێن وی وناجی ئەحمەد وبرایێ وی ژی، ئەم ئەڤ كۆما مە خۆ لێك دا ئەم بووینە یێ شەرێ دگەل رژێما دكتاتۆر وێ دەمێ ل دەستپێكی شەر بوو شەرەكی چەكداری هێشتا سەرهلدانێ دەست پێ نەكربوو ل تاخێ سەرهلدانێ وێ جهێ شەری دەستپیكر و هێدی هێدی جەماوەرێ دهۆكێ بەرەڤ ئەمنێ دهات بۆ هەلوەشاندن وژناڤبرنا رژێما دكتاتۆر و خەلكێ ژی دەرگەهیێن مالێن خوە بۆ مە ڤەكرن و سەرهلدانێ دهۆكێ دەستپێكر ودهۆك ب تەمانێ هاتە ئازادكرن ژبن دەستێ دكتاتۆریەتی".
باسنيوز
