جێگری بەڕێوەبەری گشتیی تەندروستیی هەڵەبجە رایگەیاند، ‏40 هاونیشتمانیی سنووری پارێزگای هەڵەبجە دوو رۆژی دیکە کەرەنتینەکان ‏جێدەهێڵن.‏

سروود حامید، جێگری بەڕێوەبەری گشتیی تەندروستیی هەڵەبجە ‏راگەیاند، 113 هاونیشتمانیی هەڵەبجە کە لە ئێران گەڕابوونەوە، لە دوو ‏بنکە کەرەنتینە کراون و دوو رۆژی دیکە 40 کەسیان ئەو ‏ماوەیە تەواودەکەن کە بۆیان دیاریکراوە و کەرەنتینەکان جێدەهێڵن.‏

جێگری بەڕێوەبەری گشتیی تەندروستیی هەڵەبجە باسی لەوەش کرد، هەموو ‏ئەوانەی لە کەرەنتینەکانن پشکنینیان بۆ کراوە و هەڵگری ڤایرۆسەکە نین.‏

سرود حامید جەختی لەوە کردەوە، لەو 113 کەسەی کەرەنتینە کراون، تەنیا ‏‏25 کەسیان خۆیان هاتوونەتە کەرەنتینەکان و ئەوانی دیکە لەلایەن تیمە ‏هاوبەشەکانی تەندروستی و ئاسایشەوە دەستگیرکراون و هێنراونەتە ‏کەرەنتینەکان.‏

جێگری بەڕێوەبەری گشتیی تەندروستیی هەڵەبجە ئاماژەی بەوە کرد، تاوەکو ئێستا نزیکەی ‏‏100 کەس لە ئێران گەڕاونەتەوە و نەهاتوونەتە کەرەنتینەکان.‏
‏
لە عێراق تاوەکو ئێستا 27 کەس هەڵگری ڤایرۆسی کۆرۆنان، پێنجیان لە هەرێمی کوردستانن کە سەرجەمیان لە پارێزگای سلێمانین، حکومەت و وەزارەتی تەندروستیی هەرێمی کوردستانیش سەرەڕای تووندوتۆڵکردنی رێوشوێنەکانی خۆپارێزی، داوا لە هاونیشتمانییان دەکەن رێنماییە تەندروستییەکان بە رژدی وەربگرن و جێبەجێیان بکەن، تاوەکو دووربن لە ڤایرۆسەکە.

لە هەموو جیهان تاوەکو ئێستا 91 هەزار و 320 کەس هەڵگری ڤایرۆسی کۆرۆنان، سێ هەزار و 118 کەس بە ڤایرۆسەکە گیانیان لەدەستداوە و 48 هەزار و 166 کەسیش چاکبوونەتەوە. زۆربەی ئەو کەسانەی تووشی ڤایرۆسەکە بوون و بە ڤایرۆسەکە گیانیان لەدەستداوە لە چین بوون.