ئه‌مڕۆ یەكشەممە شۆڕش ئیسماعیل وەزیری پێشمەرگە پێشوازی لە ئاواتی شێخ جه‌ناب وه‌زیری دارایی و ئابووری لەگەڵ د. ئومێد سه‌باح سه‌رۆكی دیوانی سه‌رۆكایه‌تیی ئه‌نجوومه‌نی وه‌زیرانی هه‌رێمی كوردستان كرد.

لەو كۆبوونەوەیەدا کە بە بڕیاری مەسرور بارزانی سەرۆکی حکوومەتی هەرێمی کوردستان ئەنجام دراوە، ژماره‌یه‌ك له‌ ئه‌فسه‌رانی پله‌ باڵای وه‌زاره‌ت و به‌رێوه‌به‌رانی ژمێركاری و نوێنه‌ری نووسینگه‌ی سه‌رۆكی حكوومه‌ت ئامادەی بوون، گفتوگۆی چڕوپڕ له‌سه‌ر كێشه‌ و گرفته‌ داراییه‌كانی وه‌زاره‌تی پێشمه‌رگه‌ كرا.

لەمبارەیەوە وەزیری پێشمەرگە رایگەیاند كە له‌سه‌ر پرسی پله‌ به‌رزكردنه‌وە و ده‌رماڵه‌، لە كۆبوونەوەكەدا ئاماژه‌یان به‌وه‌ كرد كه‌ فشارێكی زۆری ئه‌فسه‌ران و پێشمەرگە له‌سه‌ر وه‌زاره‌تی پێشمه‌رگه‌ هه‌یه‌ بۆ داواكردنی ئه‌و مافه‌یان كه‌ شایسته‌ی خۆیانه‌، بۆ ئه‌مه‌ش سه‌رۆكی دیوانی سه‌رۆكایه‌تی ئه‌نجوومه‌نی وه‌زیران دووپاتی كرده‌وه‌، په‌راوی دۆسیه‌كان له‌ به‌رده‌م سه‌رۆك وه‌زیرانی حكوومه‌تی هه‌رێمه‌ و به‌ پێی یاسا و رێنماییه‌ كارپێكراوه‌كان كار بۆ چاره‌سه‌ركردنی ئه‌و دۆسیه‌یه‌ ده‌كرێت.

له‌باره‌ی خه‌رجی و پێویستییه‌كانی وه‌زاره‌تی پێشمه‌رگه‌ش، وه‌زیری دارایی و ئابووری ره‌زامه‌ندی ده‌ربڕی له‌سه‌ر داواكارییه‌كانی وه‌زاره‌تی پێشمه‌رگه‌.











باسنيوز