بەهۆی شۆرتی کارەباوە لە کەمپی ئاوارەکانی شاریا لە پارێزگای دهۆک خوشک و برایەک گیانیان لەدەستدا. کەسوکاری منداڵەکان دەڵێن، بەهۆی بەهێزیی ئاگرەکەوە نەیانتوانیوە کۆنترۆڵی بکەن و ژیانی منداڵەکانیان رزگاربکەن.

منێفا حەسەن، پووری منداڵەکانە و دەڵێت، "خۆمان گەیاندە ماڵیان و ویستامن رزگاریان بکەین، بەڵام بەداخەوە نەمانتوانی".

خێزانێک کە لە چوار کەس پێکهاتبوون، شۆرتی کارەبا لەنێو ماڵی خۆیاندا دوو منداڵەکەیانی لێسەندن.

ساڵح حسێن، خاڵۆی منداڵەکانە و دەڵێت، "دایکی منداڵەکان بە هاوارەوە رایکرد بۆ لامان. ئێمەیش هاتین، بەڵام ئاگرەکە بەهێز بوو و هیچمان پێنەکرا".

ئایلین تەمەنی سێ ساڵ و دوو مانگ بوو و ئەلەندیش ساڵێک و دوو مانگ. بەهۆی ئەوەی ماڵەکەیان زۆربەی نایلۆن بووە، ئاگرەکە زوو تەشەنەی سەندووە.

فالیت داوود، باوکی منداڵەکانە و دەڵێت، "من هەر ئەو منداڵانەم هەبوو و ئەوەش قەدەری ئێمە بوو کە ئەو شۆرتە بوو و ئاگرە کەوتەوە".

باوکی ئەو منداڵانە کەمئەندامە و زیاتر لە پێنج ساڵە ئاوارەی گوندی شاریایە و لەنێو کەلاوەی خەڵکدا نیشتەجێیە.