مەم ئەسكەندەر، ئەندامێ‌ پەرلەمانێ‌ كوردستانێ‌ دیار كر، "پەرلەمانتارەكێ‌ نەوەی نوێ‌ بانگەشەیا هندێ‌ كربوو كو كابینا نوو یا حكوومەتا هەرێما كوردستانێ‌ پرۆژەیێ‌ دانانا نەخۆشخانەیا 100 تەختی یا شێلادزێ‌ ژ ناڤا لیسێن پرۆژەیێن خوە دەرخستیە، بەلێ‌ پشتی مە سەرەدانا وەزیرێ‌ تەندروستی كری، ئاشكرا بوو كو چو راستی بۆ نینە و ل ڤان نێزیكان ژی دێ‌ وەزیرێ‌ تەندروستی سەرەدانا قەزا ئامێدیێ‌ كەت".

مەم زێدەتر دبێژیت: ب هەڤالینیا بەڕێزان (مەلا ئیحسان، نەجات شەعبان و گولستان باقی) و پێشتر ژی هەڤال مۆحسن دسكی پەرلەمانتارێن فراكسیۆنا پارتی ل پەرلەمانێ‌ كوردستانێ‌، سەرەدانا وەزیرێ تەندروستی كر و بابەتێ نەخۆشخانا ناڤبری هاتە بەحسكرن، بۆ زانین سەرۆك وەزیران بۆ ڤی بابەتی ل سەر خەتە و هیچ ڕاستیەك نینە دەربارەی نەمانا ڤی بابەتی، ئەڤە و زێدەباری ئاراستەكرنا ڕاپۆرتەكا تێر و تەسەل دەربارەی كێماسی و پێدڤیێن تەندروستی ل سنورێ قەزا ئامێدیێ.

زێدەتر دبێژیت: "بریارە وەزیرێ تەندروستی سەرەدانا قەزا ئامێدیێ بكەت، ب مەرەما هایداربوون ل سەر ڕەوشا دەڤەرێ ژلایێ تەندروستیڤە".

نەخۆشخانا 100 یا ناحیا شێلادزێ‌، بەرێ‌ بنیاتی بۆ هاتیە دانان و 10% ژ پرۆژەی هاتیە جێبەجێكرن، بەلێ‌ ژ ئەگەرێ‌ قەیرانا دارایی یا ب سەر هەرێما كوردستانێ‌ دا هاتی پرۆژە هاتبوو راگرتن، نها كابینا نوو یا حكومەتا هەرێما كوردستانێ‌ هەولێن دووبارە دەست ب كاركرنا پرۆژەی دكەت.











باسنيوز