ئەمڕۆ دووشەممە لە شاری هەولێر و لە دیوانی وەزارەتی پالاندانانی حکوومەتی هەرێمی کوردستان، وەزارەتی پلاندنان لەگەڵ نوێنەری ڕێکخراوی UNDP لە هەرێمی کوردستان گرێبەستی پلانی ستراتیژیی دە ساڵەی لە چەند سێکتەرێک واژۆ کرد.

پاشان لە پرێس کۆنفرانسێکی هاوبەشی د. دارا ڕەشید وەزیری پلاندانانی حکوومەتی هەرێمی کوردستان و نوێنەری ڕێکخراوی UNDP ئامانجی ئەو گرێبەست و پلانە ستراتیژییە خرایە ڕوو و لەمبارەوە د. دارا ڕەشید گوتی: "ئێمە بۆ پلانە ستراتییەکان لە بواری توێژینەوەددا هەوڵ دەدەین هاوسەنگییەک لە نێوان شارەزایانی ناوخۆیی و بیانیدا دروست بکەین، چونکە خاوەنی سەرمایەیەکی مرۆڤیی فراوانین و ئێمە بۆ خۆمان دەزانین گرفتەکانمان لە کوێدان و چارەسەرەکان کامانەن".

د. دارا ڕەشید ئاماژەی بەوەش کرد: "ئەم پلانە ستراتیژژە دە ساڵەیەی کە ئێمە لە نێوان 2020هەتا 2030 دامانڕشتووە هەموو سێکتەرەکانی تەندروستی، پەروەردە، کشتوکاڵ و پیشەسازی، ژینگە، کارەبا، ئاو و چالاکیی شارەوانییەکان و وەبەرهێنان کە ئەوانە ئەولەویەتدان".

وەزیری پلاندانان گوتیشی: "بێگومان کاردکردن لەسەر سێکتەرەکان ئەم پلانسی ستراتیژییە، هاوتەریبە لەگەڵ کارنامە و بەرنامەی کاری کابینەی نۆیەمی حکوومەتی هەرێمی کوردستان کە بە ڕوونی لە هێڵە گشتییەکاندا باسی لێوە کراوە کە حکوومەت لە ماوەی ئەو چوار ساڵە کامە کەرت و سێکتەر پێویستن کاریان لەسەر بکرێت".

هەر لەمبارەوە نوێنەری ڕێکخراوی UNDP ڕای گەیاند: "ئێمە گرنگی بە کەرتی نەوت و غاز دەدەین و پێمان وایە تاکە ڕێگەی چارەسەکردنی کێشە ئابوورییەکانی هەرێمی کوردستان گرنگیدانە بەم کەرتە، ئەم پرۆژەیەش کە ئێمە پێوەی پابەندین و دەمانەووێ لەگەڵ وەزارەتی پلاندانانی حکوومەتی هەرێمی کوردستان جێبەجێی بکەین، هەوڵمان داوە بەرفراوان بێت و تەنیا یەک وەزارەت نەبێت، بەڵکوو هەموو وەزارەتەکان بگرێتەوە، هاوکات وەزارەتی پلاندان بەڵێنیی داوە هاوکاریی تەکنیکی و هونەریی ئەم پرۆژەیە بکات تاکوو کۆمەلگەی نێودەوڵەتیش هاوکار بێت لە چارەسەرکردنی ئەو کێشە ئابوورییانەی کە هەرێمی کوردستان بەدەستییەوە دەناڵێنێت".








باسنيوز